అత్తయ్య ఆస్తులపై ఆశ లేదు: దీప

జయలలిత మేనకోడలు దీప జయకుమార్ తనకు అత్తమ్మ ఆస్తులు వద్దని, వాటిపై తనకు ఆశలేదని స్పష్టం చేశారు. శుక్రవారం జయలలిత జయంతి సందర్భంగా మెరీనా బీచ్ వద్దకు వెళ్లి అత్తకు నివాళులు అర్పించిన అనంతరం దీప కాసేపు మీడియాతో మాట్లాడారు. పోయెస్ గార్డెన్ తమకు హక్కు ఉందని మీ సోదరుడు అంటున్నారు కదా... అని విలేకరులు ఆమెను అడిగారు.

అందుకు దీప మాట్లాడుతూ అత్తమ్మ ఉపయోగించిన పెన్ను కూడా తాను తాకనని, తనకు ఆస్తులు ముఖ్యం కాదని అన్నారు. అలాంటి ఆలోచనలు కూడా తనకు లేవని చెప్పుకొచ్చారు. గతేడాది ఇదే రోజున అత్తను కలిసి శుభాకాంక్షలు చెప్పానని, అది ఎప్పటికీ మర్చిపోలేనని అన్నారు. ఆమె దీవెనలు ఉంటే చాలని, ఆస్తులు వద్దని తెలిపారు. అలాగే ఆర్కే నగర్ ఉప ఎన్నికల్లో తాను కూడా పోటీకి దిగుతానని, తానే అత్తకు అసలైన వారసురాలినని అన్నారు. మొన్నటివరకు దీప పన్నీరుసెల్వం వెంట ఉంటారని భావించారంతా. కానీ ఆమె పన్నీరు సెల్వం వర్గంలో చేరరని తెలుస్తోంది. శుక్రవారమే ఆమె కొత్త పార్టీ పెట్టబోతున్నట్టు సమాచారం.