కీలక నేతలకూ తప్పని ఓటమి

అయిదు రాష్ట్రాల ఎన్నికల ఫలితాలు విడుదలయ్యాయి. ఈ ఎన్నికలు కొందరు కీలక నేతలకు చేదు అనుభవాన్ని మిగిల్చాయి. ఓడినవారిలో ముఖ్యమంత్రులు కూడా ఉండటం గమనార్హం.

* ఉత్తరాఖండ్‌ సీఎం హరీష్‌ రావత్‌ పోటీ చేసిన రెండు స్థానాల్లో ఓడిపోయారు.

* పంజాబ్‌ మాజీ సీఎం అమరీందర్‌ సింగ్‌ కూడా రెండు చోట్ల పోటీ చేసి ఒక స్థానంలో ఓడిపోయారు.

* గోవా ముఖ్యమంత్రి, భాజపా అభ్యర్థి లక్ష్మీకాంత్‌ పర్సేకర్‌ కూడా ఓటమి పాలయ్యారు. ఆయన.. కాంగ్రెస్‌ అభ్యర్థి దయానంద్‌ రఘునాథ్‌ సోప్టే చేతిలో ఓడిపోయారు.

* మణిపూర్‌లో సైనిక దళాల ప్రత్యేక హక్కుల చట్టాన్ని రద్దు చేయాలని డిమాండ్‌ చేస్తూ 16 ఏళ్లు నిరాహార దీక్ష చేసిన ఇరోం షర్మిలకు గట్టి ఎదురుదెబ్బ తగిలింది. మణిపూర్‌ ముఖ్యమంత్రి, కాంగ్రెస్‌ అభ్యర్థి ఇబోబి సింగ్‌ చేతిలో ఆమె ఓడిపోయారు. షర్మిలకు కేవలం 85 ఓట్లే వచ్చాయి. ఆమె పీఆర్‌జేఏ పార్టీ స్థాపించి ఆ రాష్ట్ర అసెంబ్లీ ఎన్నికల్లో పోటీ చేసిన సంగతి తెలిసిందే.

* గోవాలో ఆమ్‌ ఆద్మీ పార్టీకి ఘోర పరాభవం ఎదురైంది. పార్టీ సీఎం అభ్యర్థిగా నిలబెట్టిన ఎల్విస్‌ గోమ్స్‌ కూడా ఓటమి పాలయ్యారు.

* ఉత్తర్‌ప్రదేశ్‌ ​ అసెంబ్లీ ఎన్నికల్లో సమాజ్‌వాదీ పార్టీ వ్యవస్థాపకుడు ములాయంసింగ్‌ యాదవ్‌ కుటుంబ సభ్యురాలికి కూడా ఓటమి తప్పలేదు. లక్నో కంటోన్మెంట్‌ స్థానం నుంచి పోటీ చేసిన ములాయం కోడలు, ప్రతీక్‌యాదవ్‌ భార్య అపర్ణాయాదవ్‌ ఓడిపోయారు.

* కాగా.. గోవా అసెంబ్లీ ఎన్నిక‌ల్లో.. ప్ర‌తాప్ సింగ్ రాణే చ‌రిత్ర సృష్టించారు. వరసగా ఆయ‌న పదకొండోసారి విజ‌యం సాధించారు. ఆ రాష్ట్రానికి ఆయ‌న గ‌తంలో 5 సార్లు ముఖ్యమంత్రిగా పనిచేశారు. ప్ర‌తాప్ సింగ్ రాణేకు మొత్తం 14,977 ఓట్లు ద‌క్కాయి. ఆయ‌న పై పోటీ చేసిన బీజేపీ అభ్య‌ర్థి విశ్వ‌జిత్ కృష్ణారావు రాణేకు 10,911 ఓట్లు పోల‌య్యాయి. 2012లోనూ ఈ ఇద్ద‌రి మ‌ధ్య గ‌ట్టి పోటీ నెల‌కొంది.