బ్రీత్ ఎనలైజర్ టెస్ట్‌లో దొరికిపోయిన ఎయిరిండియా పైలెట్

మద్యం సేవించి విధులకు హాజరై అడ్డంగా దొరికిపోయాడో ఎయిరిండియా సీనియర్ పైలెట్. బ్రీత్‌ ఎనలైజర్‌ టెస్ట్‌లో విఫలమయ్యాడు. ఆదివారం మధ్యాహ్నం ఢిల్లీ నుంచి లండన్ వెళుతున్న ఫ్లైట్‌లో.. విధులు నిర్వహించేందుకు వెళ్లిన కెప్టెన్ కత్పాలియాకు అధికారులు బ్రీత్ ఎనలైజర్ పరీక్ష నిర్వహించారు. ఆ టెస్ట్‌లో రెండుసార్లు కత్పాలియా విఫలమయ్యారు. దీంతో ఆయన్ను విధుల నుంచి తప్పించి.. ఎయిర్ పోర్టు నుంచి వెనక్కు పంపారు. ఈ ఘటనతో మధ్యాహ్నం 2.45 నిమిషాలకు బయల్దేరాల్సిన విమానం గంటన్నర తర్వాత టేకాఫ్ అయ్యింది.

డీజీసీఏ నిబంధనల ప్రకారం ఫ్లైట్ ఎక్కడానికి ముందు, తర్వాత సిబ్బందికి ఆల్కహాల్ టెస్ట్‌ నిర్వహించడం తప్పనిసరి. అయితే ఫ్లైట్‌ లో డ్యూటీ చేయడానికి నిర్దేశిత సమయానికి 12 గంటల ముందు నుంచి ఆల్కహాల్ తీసుకోకూడదు. కాని కత్పాలియా ఆ నిబంధనల్ని ఉల్లంఘించినట్లయ్యింది. కత్పాలియా ఎయిరిండియాలో సీనియర్ పైలెట్‌గా ఉన్నారు.. అంతేకాదు ఎగ్జిక్యూటివ్ డైరెక్టర్ (ఆపరేషన్స్) హోదాలో కొనసాగుతున్నారు. అలాంటి వ్యక్తి బ్రీత్ ఎనలైజర్ టెస్ట్‌లో దొరికిపోవడంతో అధికారులు షాక్ తిన్నారు.

కత్పాలియా వివాదంలో చిక్కుకోవడం కొత్తేమీ కాదు. 2017 జనవరిలోలో ఢిల్లీ-బెంగళూరు వెళ్లాల్సిన ఫ్లైట్‌కు కెప్టెన్‌గా ఉన్నారు. టేకాఫ్‌కు ముందు బ్రీత్ ఎనలైజర్ టెస్ట్‌ను తప్పించుకున్నారు. దీనిపై వివాదం కూడా రేగింది. ఉల్లంఘించినందుకు ఆయనపై మే నెల వరకు సస్పెన్షన్ వేటు పడింది. మళ్లీ ఇప్పుడు కత్పాలియా వివాదంలో చిక్కుకున్నారు. మరి ఈసారి డీజీసీఏ, ఎయిరిండియా ఆయనపై ఎలాంటి చర్యలు తీసుకుంటున్నారన్నది తేలాల్సి ఉంది.
Read This Story In English