నోట్లరద్దు: బీజేపీ నేతల 6నెలల ఖాతాలు చెక్ చేయండి

పెద్ద నోట్ల రద్దు గురించి బీజేపీ నేతలకు ముందే తెలుసన్న విపక్షాల ఆరోపణలకు స్పందించిన ప్రధానమంత్రి నరేంద్రమోడి, తమ ఎంపీలు, ఎమ్మేల్యేలు ఇతర నేతల బ్యాంకు ఖాతాల వివరాలు అమిత్ షాకు అందచేయాలని ఆదేశించిన సంగతి తెలిసిందే. నవంబర్ 8వ తేదీ తరువాత నుండి జరిపిన లావాదేవీల వివరాలను అమిత్ షాకు వెల్లడించాలని ప్రధాని ఆదేశించడాన్ని ఢిల్లీ ముఖ్యమంత్రి, ఆమ్ ఆద్మీ పార్టీ అధినేత అరవింద్ కేజ్రీవాల్ తప్పుపట్టారు. నవంబర్ 8వ తేదీ తరువాత లావాదేవీలు వెల్లడించాలి కోరడం వల్ల ప్రయోజనమేమీ ఉండదని, నవంబర్ 8వ తేదీకి ఆరు నెలల ముందు నుండి జరిపిన లావాదేవీల వివరాలు వెల్లడించాలని ప్రధాని సూచించాలని సలహా ఇచ్చారు. దీనివల్ల అసలు వాస్తవం బయటపడుతుందన్నారు.

పెద్ద నోట్ల రద్దు పెద్ద స్కామ్ అని మరోమారు కేజ్రీవాల్ స్పష్టం చేశారు. ఇందులో అంబానీలతో పాటు పలువురు పారిశ్రామిక వేత్తలకు పాత్ర ఉందని ఆరోపించారు. అంబానీ, పేటీఎం, బిగ్ బజార్లలో సాగిన లావాదేవీలను కూడా పరిశీలించాలని ఆయన తన ట్విట్టరు ఖాతాలో ట్వీట్ చేస్తూ ఈ డిమాండ్ చేశారు.