ఢిల్లీ డిప్యూటీ సీఎంకు కరోనా పాజిటివ్

ఢిల్లీ డిప్యూటీ సీఎం మనీష్ సిసోడియా కరోనా బారిన పడ్డారు. ఈ విషయాన్ని ఆయన ట్విట్టర్ ద్వారా వెల్లడించారు. కొద్దిగా జ్వరంగా అనిపించడంతో టెస్టు చేయించుకోగా.. పాజిటివ్ అని రిపోర్ట్ వచ్చిందని ఆయన తెలిపారు. ప్రస్తుతం హోం ఐసోలేషన్‌లో ఉన్నానని చెప్పారు. ప్రస్తుతం తనకు జ్వరం కూడా లేదని పూర్తి ఆరోగ్యంగా ఉన్నానని.. మీ ఆశీర్వాదాలతో త్వరలోనే కోలుకుంటానని సిసోడియా ట్వీట్ చేశారు.

సోమవారం ఢిల్లీ అసెంబ్లీ ప్రత్యేక సమావేశం జరగ్గా.. జ్వరం కారణంగా సిసోడియా ఈ సమావేశానికి హాజరు కాలేదు. డిప్యూటీ సీఎంకు జ్వరంగా ఉందని.. ఆయన సమావేశానికి హాజరు కావడం లేదని స్పీకర్ రామ్ నివాస్ గోయల్ ఈ రోజు ఉదయం వెల్లడించారు. కరోనా నేపథ్యంలో మార్చి 23న ఢిల్లీ అసెంబ్లీ ఒక్క రోజు బడ్జెట్ సమావేశం నిర్వహించారు. ఆ తర్వాత మళ్లీ సోమవారం ప్రత్యేక సమావేశం నిర్వహించారు.

ఢిల్లీలో ఇప్పటి వరకూ కరోనా కేసుల సంఖ్య 2.21 లక్షలు దాటింది. ఇందులో 1.88 లక్షల మంది కోలుకోగా... 4770 మంది చనిపోయారు. దేశ రాజధానిలో ప్రస్తుతం 28,641 యాక్టివ్ కేసులు ఉన్నాయి. ఆదివారం ఢిల్లీలో 44,884 కరోనా టెస్టులు చేయగా.. 3374 పాజిటివ్‌గా తేలింది.