ఎలుక పెట్టిన చిచ్చు.. ఒకరి దారుణ హత్య

చిన్న, చిన్న కారణాలు హత్యలకు దారి తీస్తున్నాయి. క్షణికావేశంలో ఏం చేస్తున్నారో అర్థంకాని స్థితిలో తోటి మనుషుల ప్రాణాలు తీసేస్తున్నారు కొందరు. తాజాగా ఢిల్లీలో ఇలాంటి ఘటనే జరిగింది. ఎలుక విషయంలో గొడవతో ఓ వ్యక్తిని రాడ్‌తో కొట్టి చంపడం కలకలంరేపింది. నాలుగైదు రోజుల క్రితం జరిగిన ఈ ఘటన ఆలస్యంగా బయపడింది. పోలీసుల వివరాల ప్రకారం.. కిరారీ ప్రాంతంలో ఇరుగుపొరుగున ఉండే ఇద్దరు వ్యక్తుల మధ్య గొడవ జరిగింది. చచ్చిన ఎలుకను తీసుకొచ్చి తన ఇంటి ముందు వేశాడని ఓ వ్యక్తి ఆవేశంతో ఊగిపోయాడు. పొరుగింటి వ్యక్తిపైకి గొడవకు వెళ్లాడు.

ఇద్దరి మధ్య మాటా మాటా పెరిగింది. కోపంతో ఊగిపోయి.. రాడ్ తీసుకొని 40ఏళ్ల వ్యక్తిపై దాడి చేశాడు. తీవ్ర గాయాలతో అతడు కుప్పకూలిపోగా.. స్థానికులు ఆస్పత్రికి తరలించారు. అక్కడి చికిత్సపొందుతూ చనిపోయాడు. బాధితుడి మృతితో ఈ ఘటన బయటపడగా.. పోలీసులు కేసు నమోదు చేశారు. నిందితుడ్ని అరెస్ట్ చేశారు. నగరంలోని ఉత్తమ్ నగర్ మోహన్ గార్డెన్‌లో కూడా ఇలాంటి ఘటనే జరిగింది. తమ పెంపుడు కుక్కకు సారీ చెప్పలేదని ముగ్గురు యువకులు ఓ వ్యక్తిని దారుణంగా హత్య చేశారు. అది మరిచిపోకముందే ఈ ఘటనా వెలుగులోకి వచ్చింది.