Delhi Man: హెయిర్ ట్రాన్స్‌ప్లాంట్ వికటించి చనిపోయిన 30 ఏళ్ల యువకుడు

Delhi Man: ఢిల్లీలో విషాద ఘటన చోటుచేసుకుంది. హెయిర్ ట్రాన్స్‌ప్లాంట్ ప్రక్రియ వికటించి... 30 ఏళ్ల వ్యక్తి ప్రాణాలు కోల్పోయాడు. అథర్ రషీద్ అనే వ్యక్తికి బట్టతల ఉండడంతో ఒక క్లీనిక్‌లో ఇటీవల హెయిర్ ట్రాన్స్‌ప్లాంట్ చేయించుకున్నాడు. అది బాగానే జరిగినా ఆ తర్వాత నుంచి అతడికి అనేక అనారోగ్య సమస్యలు తలెత్తాయి. ట్రీట్‌మెంట్ పూర్తైన కొన్ని రోజులకు రషీద్ శరీరమంతా దద్దుర్లు మొదలయ్యాయి. తర్వాత కిడ్నీ సంబంధిత సమస్యలు ప్రారంభమయ్యాయి. శరీరంలో చాలా ఆర్గాన్స్ ఫెయిల్ అయ్యాయి. ఈ క్రమంలోనే ఆస్పత్రిలో చికిత్స పొందుతూ రషీద్ ప్రాణాలు కోల్పోయాడు. రషీద్‌కు తల్లి, ఇద్దరు చెల్లెలు ఉన్నారు. రషీద్ చనిపోవడంతో ఆ కుటుంబానికి దిక్కు లేకుండా పోయింది. దీంతో రషీద్ తల్లి పోలీసులకు ఫిర్యాదు చేశారు. వైద్యుల నిర్లక్ష్యం వల్లే రషీద్ ప్రాణాలు పోయాయని ఆరోపణలు చేశారు. హెయిర్ ట్రాన్స్‌ప్లాంటేషన్ ఓ మోసమని ఆమె అన్నారు.

ఈ మేరకు పోలీసులు కేసు నమోదు చేసుకుని... హెయిర్ ట్రాన్స్‌ప్లాంట్ చేసిన ఇద్దరు నిపుణులతోపాటు .. మరో ఇద్దరిని అదుపులోకి తీసుకున్నారు. అయితే హెయిర్ ట్రాన్స్‌ప్లాంట్ ప్రక్రియ వికటించి ప్రాణాలు కోల్పోవడం ఇదే మొదటిసారి కాదు. గతంలో కూడా ఇలానే కొంతమంది ప్రాణాలు కోల్పోయారు. 2019లో ముంబైకు చెందిన ఒక వ్యాపారవేత్త... 2021 సెప్టెంబర్ గుజరాత్‌కు చెందిన ఒక వ్యక్తి హెయిర్ ట్రాన్స్‌ప్లాంట్ వల్లే మృతి చెందారు.