నోట్ల రద్దుపై మీకు ఓ ప్లాన్ అంటూ వుందా ? కేంద్రానికి సుప్రీం సూటి ప్రశ్న

నోట్ల రద్దుపై కేంద్రానికి అసలు ఓ ప్లాన్ అంటూ వుందా లేదా ? లేకపోతే ఏదో నామమాత్రంగా అలా పాత రూ.500 నోట్లు, రూ.1000 నోట్లని రద్దు చేశారా చెప్పండి అంటూ శుక్రవారం కేంద్రాన్ని నిలదీసింది అత్యున్నత న్యాయస్థానం సుప్రీం కోర్టు. రద్దైన పాత కరెన్సీ రూ.10-11 లక్షల కోట్ల వరకు వెనక్కి వస్తుందని అంచనా వేశాం కానీ అంతకుమించే వెనక్కి వచ్చిందని శుక్రవారం అటార్నీ జనరల్ ముకుల్ రోహ్తగ్ ఇచ్చిన సమాధానంపై స్పందించిన సుప్రీం కోర్టు... అసలు ఏం ఆశించి ఈ పాత నోట్లని రద్దు చేశారో చెప్పండి అని అడిగింది.

ఈ పాత నోట్లని రద్దు చేయాలని నిర్ణయం తీసుకున్నప్పుడు ఏం ఆశించారు ? అది నెరవేరిందా ? ఒకవేళ రూ.10-11 లక్షల కోట్ల పాత కరెన్సీ తిరిగి వెనక్కి వస్తుంది అని అంచనా వేసినప్పుడు, అంత మేరకు కొత్త కరెన్సీని ఎందుకు ప్రజలకి అందుబాటులోకి తీసుకురాలేకపోయారు అని ప్రశ్నల వర్షం కురిపించింది. అంతేకాకుండా నవంబర్ 8న ఈ నిర్ణయం తీసుకోవడానికి ముందు జరిగిన కేబినెట్ భేటీకి సంబంధించిన కేబినెట్ నోట్‌ని ఇవ్వగలరా అని అటార్నీ జనరల్‌ని అడిగింది కోర్టు.

పబ్లిక్ అందరికీ సరిపోయేంత కొత్త కరెన్సీ తమకి రావడం లేదనే కారణంతో వారానికి రూ.24,000 విత్ డ్రా చేసుకోవచ్చనే నియమానికి బ్యాంకులు తూట్లు పొడుస్తుండటంపైనా సుప్రీం కోర్టు ఒకింత సీరియస్ అయ్యింది. వారానికి రూ.24,000 వరకు విత్ డ్రా చేసుకోవచ్చనే పరిమితిపై కూడా బ్యాంకులు కోత విధిస్తుండటంపై సుప్రీం కోర్టు ఈ సందర్భంగా ప్రస్తావించింది. ఈ పరిమితిపై ఏమైనా పునరాలోచనా వుందా లేదా అనేది కూడా బుధవారంలోగా సమాధానం ఇవ్వాలని కేంద్రాన్ని ఆదేశించింది సుప్రీం కోర్టు.