బీఎస్పీ, మాయావతి సోదరుడి ఎకౌంట్లో భారీగా డిపాజిట్లు

రోజువారి తనిఖీల్లో భాగంగా ఎన్‌‌ఫోర్స్‌మెంట్ డైరెక్టరేట్ చేపట్టిన సోదాల్లో ఢిల్లీలోని యునైటెడ్ బ్యాంక్ ఆఫ్ ఇండియా (కరోల్‌బాగ్ శాఖ)లో వున్న బీఎస్పీ పార్టీ ఎకౌంట్‌లో రూ.104 కోట్ల డిపాజిట్ అయినట్టు తేలింది. నోట్ల రద్దు అనంతరమే ఈ మొత్తం నగదు డిపాజిట్ అయినట్టుగా ఈడీ గుర్తించింది. ఇందులో రూ.102 కోట్లు రూ. 1000 నోట్లు కాగా మిగతా మొత్తం రూ.500 నోట్లతో డిపాజిట్ చేసినట్టు ఈడీ సోదాల్లో బయటపడింది.

ఇదే బ్రాంచ్‌లో ఎకౌంట్ కలిగి వున్న బీఎస్పీ అధినేత్రి మాయావతి సోదరుడు ఆనంద్ కుమార్ ఎకౌంట్‌లోనూ రూ.1.43 కోట్లు బ్యాంక్ డిపాజిట్ వున్నట్టు గుర్తించిన ఈడీ అధికారులు... నోట్ల రద్దు అనంతరం పాత నోట్లతో రూ.18.98 లక్షలు ఈ ఎకౌంట్‌లో డిపాజిట్ అయినట్టు స్పష్టంచేశారు. దీంతో ఈ రెండు ఎకౌంట్లకు సంబంధించిన పూర్తి వివరాలతోపాటు సీసీటీవీ ఫుటేజీ ఇవ్వాల్సిందిగా సంబంధిత బ్యాంకు అధికారులని కోరిన ఈడీ... ఇదే విషయంపై ఇన్‌కమ్‌టాక్స్ అధికారులకి కూడా లేఖ రాసేందుకు సిద్ధమైనట్టు సమాచారం.