పాత కరెన్సీతో రీఛార్జ్ చేయించుకుంటున్నారా?

పాత రూ.500, రూ.1000 నోట్లను బ్యాంకుల్లో మార్పిడి చేసుకోమని, డిపాజిట్ చేసుకోవడానికి నవంబర్ 24తో గడువు ముగిసిపోయింది. మరి చేతిలో ఉన్న పెద్ద నోట్లను ఏం చేయాలి అని బాధపడే సామాన్య ప్రజలకి వాటిని వాడేందుకు మరికొన్ని అవకాశాలు కల్పించారు. అలా ఇచ్చిన అవకాశాలలో ప్రీ పెయిడ్ మొబైల్ రీఛార్జ్ కూడా ఒకటి. పాత అయిదువందల నోటు ఇచ్చి మొబైల్ కి ప్రీపెయిడ్ రీఛార్జ్ చేయించుకోవచ్చు. ఈ అవకాశం కూడా డిసెంబర్ 15 వరకే. అయితే తాజాగా కేంద్రం మరో నిబంధన కూడా విధించింది. ఇది ప్రజలకు కాదు టెలికాం సర్వీసు ప్రొవైడర్లకు.

ఎవరైతే పాత అయిదువందల నోటుతో ప్రీపెయిడ్ టాపప్స్ కొంటారో... ఆ వినియోగదారుడి ఫోన్ నెంబర్ ను, పేరును కూడా ప్రభుత్వానికి పంపించాల్సిందిగా ఆర్థిక మంత్రిత్వ శాఖ సర్వీసు ప్రొవైడర్లను ఆదేశించింది. మన దేశంలో పోస్ట్ పెయిడ్ మొబైల్ సర్వీసులు వాడే చాలా తక్కువ. 90 శాతం మంది ప్రీ పెయిడ్ సర్వీసులే వాడతారు. కనుక భారీ మొత్తంలోనే పాత అయిదువందల నోట్లు వచ్చే అవకాశం ఉంది.