నోట్ల రద్దు సరైందే కానీ...: బిహార్ సీఎం నితీష్

ప్రధానమంత్రి నరేంద్ర మోదీ నోట్లరద్దు నిర్ణయాన్ని తాను స్వాగతిస్తున్నట్లు బిహార్ ముఖ్యమంత్రి నితీష్ కుమార్ మరోసారి స్పష్టం చేశారు. అయితే పెద్ద నోట్లు రద్దు చేసేముందు చిన్ననోట్లు రూ.100 వంటి వాటిని అన్నిబ్యాంకుల్లో, ఏటీఎంలలో సరిపడా ఉండేలా ఏర్పాట్లు చేయాల్సిందని, ప్రజలకు ఇంత అసౌకర్యం కల్గకుండా తగు చర్యలు తీసుకోవాల్సిందని ఆయన అభిప్రాయపడ్డారు.

శుక్రవారం నితీష్ కుమార్ అసెంబ్లీ ఆవరణలో మీడియాతో మాట్లాడారు.

నోట్లరద్దు నిర్ణయాన్ని సమర్థించిన నితీష్...బ్లాక్ మనీ నోట్ల రూపంలోనే దాగి ఉండదని, భూములు, ఆస్తులు, బంగారం, వజ్రాల రూపంలోనూ, బినామీల పేర్లతోనూ ఉంటుందని దాన్ని కూడా వెలికితీయాలని కేంద్రానికి సూచించారు.

నితీష్ ప్రభుత్వం భాగస్వామి అయిన ఆర్జేడీనేత లాలూ ప్రసాద్ యాదవ్...పెద్దనోట్ల రద్దు నిర్ణయాన్ని వ్యతిరేకిస్తున్నారు. ఇదే విషయాన్ని నితీష్ వద్ద ప్రస్తావించగా...బిహార్ ప్రభుత్వంలో తాము సంకీర్ణమని...కేంద్రప్రభుత్వ నిర్ణయాలపై వ్యక్తిగత అభిప్రాయాలు కల్గి ఉండటం తప్పేమీ కాదని స్పష్టం చేశారు.

దేశవ్యాప్తంగా కల్తీ మద్యం అమ్మకాలపై చర్యలు తీసుకోవాలని నితీష్ మోదీ సర్కారుకు సూచించారు.