నోట్లరద్దుపై చర్చ, ప్రధాని మోదీ నవ్వులు

నవంబర్ 8 అర్థరాత్రి నుంచి పెద్ద నోట్లు రూ.500, రూ.1000లు చెలామణీలో ఉండబోవని ప్రకటించినప్పటి నుంచి ప్రధానమంత్రి నరేంద్రమోదీ ముఖంలో నవ్వు ఛాయలు మాయమయ్యాయి.

వివిధ సందర్భంగా నోట్ల రద్దుపై ఉద్వేగభరితంగా ప్రసంగించారు. కొన్నిచోట్ల నోట్ల రద్దుతో నల్లధనం కుబేరులకు నిద్రపట్టడం లేదని ఆగ్రహంగా మాట్లాడారు. ఒక్కమాటలో చెప్పాలంటే గత పక్షం రోజుల నుంచి మోదీ నవ్వడం లేడు. ఆయన ముఖంలో నవ్వు ఛాయలే కనబడటం లేదు. ఆ మాటకొస్తే ఆయన సహచర మంత్రులు కూడా మోదీనే అనుసరిస్తున్నారు. కానీ గురువారం రాజ్యసభలో మోదీ నవ్వారు.

పార్లమెంటు శీతాకాల సమావేశాల ప్రారంభం నుంచి గురువారం వరకు పెద్దనోట్లపై చర్చకు అనుమతించేవరకు సభను సజావుగా ప్రతిపక్షాలు సాగనీయలేదు.

గురువారం రాజ్యసభలో పెద్దనోట్లపై చర్చ చేపట్టారు. ఈ చర్చను మాజీ ప్రధాని మన్మోహన్ సింగ్ ప్రారంభించారు. చర్చ సందర్భంగా ప్రతిపక్షాలు లేవనెత్తిన ప్రతి అంశాలను ప్రధాని మోదీ సహా ఆర్థిక మంత్రి అరుణ్ జైట్లీ ఆసక్తిగా విన్నారు.

మన్మోహన్ సింగ్ తర్వాత ఎస్పీ ఎంపీ అగర్వాల్ ప్రసంగంతో సభలో నవ్వులు విరబూశాయి. ఆయన మాట్లాడిన తీరుకు మోదీ, జైట్లీలు పెద్దగా నవ్వారు.

ఇంతకు వారు అలా ఎందుకు నవ్వారంటే.... పెద్దనోట్ల రద్దుపై చర్చలో పాల్గొన్న అగర్వాల్..రూ.500, రూ.1000నోట్లు రద్దు ప్రకటనకంటే మోదీ తన సహచరులకు కూడా సమాచారం ఇవ్వలేదని అన్నారు.
‘ప్రధాని మోదీ కనీసం అరుణ్ జైట్లీని (నోట్ల రద్దుపై) కూడా నమ్మలేదు. ఒకవేళ అరుణ్ జైట్లీకి ఈ విషయం తెలిసి ఉంటే మా అందరికీ ( ప్రతిపక్షాలు) చెప్పేవారు’ అని అగర్వాల్ అనేసరికి మోదీ, జైట్లీలు గట్టిగా నవ్వారు. వీరితోపాటు సభలో సభ్యులు ఒక్కసారిగా నవ్వారు.

నోట్లరద్దుపై మోదీ సర్కారును విమర్శించిన అగర్వాల్..మరోసారి కూడా సభలో నవ్వులు విరబూసేలా చేశారు. ‘ఉత్తర్ ప్రదేశ్ లో మీకేలాంటి ఇబ్బంది ఉండబోదు’ అంటూ మోదీని చూస్తూ అగర్వాల్ అనడంతో మరోసారి పీఎం సహా అంతా నవ్వారు.