డేరా బాబా వేషాలు.. గుఫాలో ‘బిగ్ బాస్’

అత్యాచారం కేసులో జైలు శిక్ష అనుభవిస్తున్న డేరా సచ్ఛా సౌధ మాజీ చీఫ్ గుర్మీత్ రామ్ రహీమ్ సింగ్ వేషాలు అన్నీ ఇన్నీ కావు. ఈయనేమో సల్మాన్ ఖాన్, ఆయన అనుచరులు కాంటెస్టెంట్స్, బాబా రహస్య మందిరం ‘గుఫా’ బిగ్ బాస్ హౌస్. అక్కడ తన అనుచరులతో బిగ్ బాస్ షో తరహాలో ఒక ఎంటర్‌టైన్‌మెంట్ షో. ఆయనే హోస్ట్, ఆయనే జడ్జ్. ఆయన వేషాలు రికార్డు కావడానికి సీసీటీవీ కెమెరాలు కూడా ఉంటాయి. అవునండీ ఇదంతా నిజమే. ఈ విషయాన్ని డేరా బాబా దత్త పుత్రికగా చెప్పుకునే హనీప్రీత్ మాజీ భర్త విశ్వాస్ గుప్తా వెల్లడించారు. ‘గుర్మీత్ సింగ్ గుఫాలో ‘బిగ్‌ బాస్‌’ తరహా ప్రదర్శన నిర్వహించేవాడు. అందులో అంతా జంటలనే పాల్గొనేలా చేసేవాడు. మొత్తం ఆరు జంటలతో నిర్వహించిన ఆ కార్యమక్రమం 28రోజుల పాటు సాగింది’ అని విశ్వాస్‌ గుప్తా శుక్రవారం ఢిల్లీలో మీడియాకు చెప్పారు.

హనీప్రీత్‌ను డేరాబాబా దత్తపుత్రికగా పేర్కొనడాన్ని గుప్తా తీవ్రంగా ఖండించారు. గుర్మీత్‌తో హనీప్రీత్‌కు శారీరక సంబంధం ఉందని ఆయన వెల్లడించారు. డేరాబాబా, హనీప్రీత్‌ ఇద్దరూ తనను, తన కుటుంబాన్ని ఎన్నోసార్లు దారుణంగా బెదిరించినట్లు చెప్పారు. 2009 నుంచీ హనీప్రీత్‌ ఓ భార్యలాగా డేరాబాబాతో ఉంటోందని గుప్తా ఆరోపించారు. డేరాబాబా ఆదేశాల మేరకే తాను 1999లో హనీప్రీత్‌ను వివాహం చేసుకున్నానని గుప్తా తెలిపారు. 2011లో విడాకులకు దరఖాస్తు చేసుకున్నట్లు చెప్పారు. ఆయుధాలు ఉన్న పెద్ద పెట్టె ఎప్పుడూ గుర్మీత్‌ పక్కనే ఉండేదని, అతను ఏ కారులో వెళితే ఆ కారులో అనుచరులు ఆయుధాల పెట్టెను పెట్టేవారని తెలిపాడు. ఈ విషయాలన్నీ బయటపెట్టినందుకు తనకు డేరాబాబా అనుచరుల నుంచి ప్రాణభయముందని ఆందోళన వ్యక్తం చేశారు.