మహారాష్ట్ర సీఎం పదవికి ఫడ్నవీస్ రాజీనామా.. ఎన్సీపీపై ఆసక్తికర వ్యాఖ్యలు

మహారాష్ట్ర రాజకీయాలు మంగళవారం మరో మలుపు తిరిగాయి. ప్రమాణ స్వీకారం చేసిన మూడు రోజులకే సీఎం పదవికి దేవేంద్ర ఫడ్నవీస్ రాజీనామా చేశారు. గవర్నర్‌కు రాజీనామా లేఖ సమర్పించడానికి ముందు ఆయన మీడియాతో మాట్లాడారు. ఈ సందర్భంగా.. శివసేనపై విమర్శలు గుప్పించారు. రాష్ట్రంలో మెజార్టీ ప్రజలు బీజేపీకే మద్దతు పలికారని తెలిపారు. సీఎం పీఠం కోసం శివసేన తమను మోసం చేసిందన్నారు.

డిప్యూటీ సీఎం పదవికి అజిత్ పవార్ రాజీనామా చేయడంతో.. ప్రభుత్వ ఏర్పాటుకు సరిపడా సంఖ్యాబలం తమకు లేదని ఫడ్నవీస్ చెప్పారు. ఎన్సీపీ శాసనసభా పక్ష నేత అయిన అజిత్ పవార్ మద్దతు ప్రకటించడంతో.. ఆ పార్టీ ఎమ్మెల్యేలంతా తమకు అండగా ఉంటుందని భావించానని భవిష్యత్తులో ఎమ్మెల్యేలను ప్రలోభాలకు గురి చేయబోమన్నారు. శివసేన-ఎన్సీపీ-కాంగ్రెస్ ఏర్పాటు చేయబోయే ప్రభుత్వాన్ని మూడు చక్రాల బండితో పోల్చిన ఫడ్నవీస్.. ఉద్ధవ్ సర్కారు ఐదేళ్లపాటు సీఎంగా ఉంటుందని తాను అనుకోవడం లేదన్నారు.

80 గంటలు మాత్రమే సీఎంగా పని చేసిన దేవేంద్ర ఫడ్నవీస్.. మహారాష్ట్ర చరిత్రలో అత్యల్ప కాలం ముఖ్యమంత్రి పదవిలో ఉన్న నేతగా రికార్డ్ క్రియేట్ చేశారు. గత టర్మ్‌లో ఆయన ఎలాంటి అవినీతి మరక లేకుండా పాలన సాగించారు.
సుప్రీం కోర్టు ఆదేశాల మేరకు బుధవారం ఫడ్నవీస్ సర్కారు బలాన్ని నిరూపించుకోవాల్సి ఉండగా.. అంతకు ముందే ఆయన రాజీనామా చేయడం గమనార్హం. బీజేపీ ప్రభుత్వం కూలిపోగా.. శివసేన నేత ఉద్ధవ్ థాక్రే సీఎం కావడానికి లైన్ క్లియర్ అయ్యింది.

అధికారం కోసం శివసేన సోనియా గాంధీ నాయకత్వాన్ని అంగీకరించిందని ఫడ్నవీస్ మండిపడ్డారు. పొత్తు పెట్టుకొని ఎన్నికల్లో పోటీ చేశాక.. శివసేన సీఎం పీఠం కోసం బీజేపీని వీడిందన్నారు. శివసేన-ఎన్సీపీ-కాంగ్రెస్ కూటమి స్థిరమైన ప్రభుత్వాన్ని అందిచలేవన్న ఆయన.. ప్రతిపక్ష నేతగా వ్యవహరిస్తానని స్పష్టం చేశారు.

అంతకు ముందు అజిత్ పవార్ డిప్యూటీ సీఎం పదవికి రాజీనామా చేశారు. శరద్ పవార్ భార్య మాట్లాడటంతో.. ఆయన మనసు మార్చుకున్నారని తెలుస్తోంది. అజిత్ పవార్‌ను వెనక్కి రప్పించడంలో ఎన్సీపీ సఫలం కావడంతో... మహా డ్రామాకు తెరపడింది.

Read Also: అజిత్ పవార్ ‘రాజీ’నామా
Read Also: డ్యామిట్.. ‘మహా’ రాజకీయాలపై పేలుతున్న జోకులు

Read Also: ఉద్ధవ్ థాక్రే గురించి తెలుసుకోవాల్సిన విశేషాలు..undefined