ఆలయంలో అలాంటి పనులా.. చిక్కుల్లో మోడల్

పవిత్రతకు ప్రతీకలుగా నిలిచే ఆలయాలలో పిచ్చి పిచ్చి చేష్టలు చేయడం తగదంటూ మోడల్ నందినీ కురిల్‌పై నెటిజన్లు మండిపడుతున్నారు. ఆలయంలో ఆమె హాట్ హాట్‌గా తీసుకున్న ఫొటోలు, వీడియోలు సోషల్ మీడియాలో వైరల్ కావడం విమర్శలకు కేంద్ర బిందువైంది. ఆ వివరాలిలా.. మధ్యప్రదేశ్‌లోని ఉజ్జయిని మహాకాళేశ్వర ఆలయంలో మోడల్ నందినీ కురిల్ వీడియో, ఫొటోషూట్ నిర్వహించింది. ఈ క్రమంలో మోడల్ ఫొటోలు, వీడియోలు సోషల్ మీడియాలో వైరల్ అయ్యాయి. కొందరు భక్తులు ఈ విషయాన్ని ఆలయ అధికారుల దృష్టికి తీసుకెళ్లడంతో పాటు మోడల్‌పై చర్యలు తీసుకోవాలని డిమాండ్ చేశారు.

ఈ ఘటనపై స్పందించిన ఆలయ అధికారి అభిషేక్ మీడియాతో మాట్లాడుతూ.. ఆలయాల్లో ఇలాంటి పనులు చేయడం భావ్యం కాదన్నారు. వీడియోలు, ఫొటోలపై సమాధానం చెప్పాలని ముంబైకి చెందిన మోడల్ నందినీ కురిల్‌కు నోటీసులు పంపినట్లు ఆయన తెలిపారు. ఆమె వివరణ ఇచ్చిన తర్వాత ఎలాంటి చర్యలు చేయాలో నిర్ణయిస్తాం అన్నారు. సీసీటీవీ ఫుటేజీ పరిశీలిస్తే ఏ సమయంలో ఇలా జరిగింది, ఇందుకు బాధ్యలు ఎవరన్నది తెలుసుకుని కఠిన చర్యలు తీసుకోనున్నట్లు పేర్కొన్నారు.