ఇవేం సర్జరీలు! మహిళ పొట్టలో ఓసారి కాటన్.. మరోసారి 5 సిరంజీలు

ఆపరేషన్ చేసి పేషెంట్ల పొట్టలో సిరంజీలు అలాగే పెట్టి కుట్లేసిన ఘటనలు గతంలో చాలా చూశాం. అయితే ఈ ఘటన కాస్త భిన్నమైంది. ఓసారి ఆపరేషన్ చేసి మహిళ పొట్టలో కాటన్ అలాగే మరిచిపోయి కుట్లేశారు. కడుపునొప్పితో మరోసారి ఆసుపత్రిలో చేరితే ఈసారి ఏకంగా సిరంజీలే పెట్టి కుట్లేశారు. ఉత్తరప్రదేశ్‌లోని వారణాసిలో ఈ ఘటన చోటు చేసుకుంది. వికాస్ ద్వివేది అనే వ్యక్తి 2017లో తన భార్యకు తీవ్రమైన కడుపునొప్పి రావడంతో సర్ సుందర్‌లాల్ ఆసుపత్రిలో చేర్పించాడు. ఆ సమయంలో సర్జరీ చేసిన వైద్యులు ఆమె పొట్టలో నాలుగైదు సిరంజీలు అలాగే వదిలేసి కుట్లేశారు.

సర్జరీ అనంతరం ఆమె కడుపునొప్పి మరింత తీవ్రమవడంతో మళ్లీ ఆసుపత్రిలో చేర్పించారు. ఈసారి సర్జరీ చేసిన వైద్యులు ఆమె పొట్టలో రెండు సిరంజీలను గుర్తించారు. అనంతరం ఎక్స్‌రే తీయగా.. ఆమె పొట్లలో మరో 3 సిరంజీలు ఉన్నట్లు గుర్తించారు. ఆసుపత్రి నిర్వాకంపై ఆగ్రహం వ్యక్తం చేసిన ద్వివేది పోలీసులకు ఫిర్యాదు చేశాడు.

2013లో తన భార్యను కాన్పు కోసం తీసుకెళ్లినప్పుడు కూడా వైద్యులు ఆమె పొట్టలో కాటన్, మాంసపు వ్యర్థాలను వదిలేశారని ద్వివేది చెబుతున్నాడు. ఘటనపై కేసు నమోదు చేసిన పోలీసులు విచారణ ప్రారంభించారు.