గుజరాత్‌లో మళ్లీ భూకంపం

గుజరాత్‌ మరోసారి భూకంపం సంభవించింది. ఆదివారం (ఫిబ్రవరి 26) మధ్యాహ్నం 3.21 గంటల సమయంలో రిక్టర్‌ స్కేల్‌పై 4.3 తీవ్రతతో భూ ప్రకంపనలు చోటు చేసుకున్నాయి. రాజ్‌కోట్‌‌కు ఉత్తర వాయవ్యంగా 270 కిలోమీటర్ల దూరంలో భూకంప కేంద్రం ఉన్నట్లు నేషనల్‌ సెంటర్‌ ఆఫ్ సిస్మోలజీ తెలిపింది. భూమిలో పది కిలోమీటర్ల లోతున భూకంప కేంద్రం ఉన్నట్లు వెల్లడించింది. ఇప్పటివరకు నష్టానికి సంబంధించి ఎలాంటి నివేదికలు అందలేదని అధికారులు తెలిపారు.

ఉత్తర భారతదేశంలో ఈ నెలలో భూకంపం రావడం ఇది మూడోసారి. ఫిబ్రవరి 22న ఢిల్లీ, ఉత్తరాఖండ్‌లో ప్రకంపనలు చోటుచేసుకున్నాయి. భూకంప కేంద్రాన్ని నేపాల్‌లో గుర్తించారు. ఫిబ్రవరి 4న గుజరాత్‌లోని అమ్రేలిలో భూకంపం చోటు చేసుకుంది. ఉదయం 7.41 గంటలకు 3.2 తీవ్రతతో భూమి కంపించింది. రెండు రోజుల వ్యవధిలోనే మూడు సార్లు భూ ప్రకంపనలు నమోదయ్యాయి. వరుస భూ ప్రకంపనల నేపథ్యంలో ప్రజలు భయాందోళనలకు గురవుతున్నారు.