Rahul Gandhi: రాహుల్ గాంధీపై అనర్హత వేటు.. వయనాడ్ స్థానానికి ఉపఎన్నికపై ఈసీ క్లారిటీ

Rahul Gandhi: కాంగ్రెస్ అగ్రనేత రాహుల్ గాంధీ ప్రాతినిథ్యం వహించిన కేరళలోని వయనాడ్ పార్లమెంట్ స్థానానికి ఉపఎన్నికపై కేంద్ర ఎన్నికల సంఘం క్లారిటీ ఇచ్చింది. లోక్‌సభ ఎన్నికలకు ఏడాదికిపైగా సమయం ఉండటంతో వయనాడ్ లోక్‌సభ స్థానానికి ఎన్నికలు నిర్వహించాల్సి ఉంటుందని సీఈసీ స్పష్టం చేసింది. కోర్టు తీర్పు తర్వాతే వయనాడ్ స్థానానికి ఉపఎన్నికపై నిర్ణయం తీసుకుంటామని తెలిపింది. రాహుల్ గాంధీకి కోర్టు ముప్పై రోజుల టైమ్ ఇచ్చిన విషయాన్ని ఈసీ గుర్తు చేసింది.

'ఒక సీటు ఖాళీ అయిన తర్వాత ఉపఎన్నిక నిర్వహించేందుకు మాకు ఆరు నెలల సమయం ఉంటుంది. ట్రయల్ కోర్టు న్యాయపరమైన పరిష్కారానికి 30 రోజుల సమయం ఇచ్చింది. కాబట్టి మేము వేచి చూస్తాం' అని సీఈసీ రాజీవ్ కుమార్ పేర్కొన్నారు. ఆప్‌కు జాతీయ స్థాయి పార్టీ హోదా ఇచ్చే అంశం కమిషన్ సమీక్షలో ఉందని తెలిపారు.

కర్ణాటక అసెంబ్లీ ఎన్నికల షెడ్యూల్‌ను బుధవారం ప్రకటించిన ఈసీ.. ఈ సందర్భంగా దేశంలో ఖాళీ అయిన పలు పార్లమెంట్, అసెంబ్లీ స్థానాలకు ఉపఎన్నికల తేదీని ప్రకటించింది. పంజాబ్‌లోని జలంధర్ పార్లమెంట్ స్ధానం, ఒడిశాలోని ఝర్సుగూడ అసెంబ్లీ నియోజకవర్గం, ఉత్తరప్రదేశ్‌లోని చ్చంబెయ్ అసెంబ్లీ నియోజకవర్గం, సూర్, మేఘాలయలోని సోహియోంగ్ నియోజకవర్గాలకు ఉపఎన్నికలు నిర్వహించనుంది.

ఈ ఉపఎన్నికలకు ఏప్రిల్ 13న నోటిఫికేషన్ విడుదల చేయనుండగా.. 20వ తేదీ వరకు నామినేషన్ల స్వీకరణకు గడువు ఇచ్చారు. 21వ తేదీన నామినేషన్ల స్క్రూటినీ నిర్వహించనుంగా.. ఉపసంహరణకు 24 వరకు సమయం ఇచ్చారు. మే10న పోలింగ్, మే 13న కౌంటింగ్ జరగనుంది. లోక్‌సభ ఎన్నికలకు ముందు జరగనున్న కర్ణాటక, ఇతర రాష్ట్రాల్లోని ఉపఎన్నికలపై రాజకీయ వర్గాల్లో ఆసక్తి నెలకొంది. ఈ ఎన్నికల్లో తొలిసారి ఇంటి నుంచే ఓటు వేసే అవకాశం ఈసీ కల్పిస్తోంది. దీంతో ఈ ఓటింగ్ సిస్టమ్‌పై అందరిలోనూ ఆసక్తి నెలకొంది.

• Read More Telangana News And Telugu News