కార్తీకం ముగిసిందని కోడి గుడ్డు కొనబోతే..!

ప్రతి రోజూ గుడ్డు తినడం వల్ల ఆరోగ్య పరంగా ఎన్నో ప్రయోజనాలు ఉన్నాయనే సంగతి తెలిసిందే. చౌక ధరలో అందుబాటులో ఉండటంతో సామాన్యులు ఎక్కువగా గుడ్డు తినేందుకు మొగ్గు చూపుతారు. కానీ కొద్ది కాలంగా గుడ్డు ధరలు భారీగా పెరిగిపోతున్నాయి. దీంతో గుడ్డు కంటే చికెన్ బెటర్ అనిపిస్తోంది. కూరగాయల ధరలు పెరిగిన ప్రభావం గుడ్లపై కూడా పడింది. రిటైల్ మార్కెట్లో ఒక్కో గుడ్డు దాదాపు రూ.7 పలుకుతోంది. విజయవాడ, విశాఖ నగరాల్లో వంద గుడ్ల ధర రూ. 532 పలుకుతుండగా.. హైదరాబాద్‌లో రూ. 535 పలుకుతోంది. ముంబై, పుణే లాంటి నగరాల్లోనైతే వంద గుడ్ల ధర ఏకంగా రూ. 585 వరకు చేరింది.

ఈ నెల ప్రారంభం నుంచి ఇప్పటి వరకూ వంద గుడ్ల ధర రూ. 110కి పైగా పెరగడం గమనార్హం. హోల్‌సేల్‌గా గుడ్ల రేట్లు భారీగా పెరగడంతో.. రిటైల్‌గా కొన్ని చోట్ల రూ. 6.5 నుంచి రూ.7.5 వరకు విక్రయిస్తున్నారు. ఒక్కో గుడ్డు సగటున 55 గ్రాములు ఉంటుంది అనుకుంటే.. కిలో బరువు తూగడానికి రూ. 120-135 వరకూ ఖర్చు పెట్టాల్సి వస్తోంది. రూ. 130- 150 పెడితే స్కిన్‌లెస్ చికెన్ కిలో వస్తోంది. ఈ ఏడాది ఆరంభంలో వంద గుడ్ల ధర సగటున రూ. 333 పలకగా అది క్రమంగా పెరుగుతూ.. రూ. 532 దాటింది. ఈ స్థాయిలో గుడ్ల ధరలు పెరగడం గతంలో ఎన్నడూ చూడలేదని పౌల్ట్రీ యజమానులు చెబుతున్నారు.


దేశంలో కోడి గుడ్ల డిమాండ్ 15 శాతం పెరగడంతోనే ధరలు పెరిగాయని నేషనల్ ఎగ్ కోఆర్డినేషన్ కమిటీ (ఎన్ఈసీసీ) ఎగ్జిక్యూటివ్ మెంబర్ రాజు భోసలే తెలిపారు. ఉల్లిపాయలు, టమాటా లాంటి నిత్యవసరాలు కిలో రూ. 50 వరకూ పలుకుతున్నాయి. క్యాబేజీ, క్యాలీఫ్లవర్, వంకాయ లాంటి కూరగాయల ధరలు కిలో. 60 దాటేశాయి. దీంతో జనాలు చౌకగా లభించే గుడ్లను కొనుగోలు చేయడానికి మొగ్గు చూపుతున్నారు. నోట్ల రద్దు, కోళ్ల మేత ఖర్చులు పెరగడం కూడా గుడ్ల ధరలు పెరగడానికి కారణమైంది.


వాస్తవానికి కార్తీక మాసంలో తెలుగు ప్రజలు మాంసాహారం తినడానికి ఇష్టపడరు. ఇప్పుడు కార్తీక మాసం ముగిసిన నేపథ్యంలో గుడ్ల ధరలు మరింత పెరిగే అవకాశం ఉంది. కార్తీక మాసం కావడంతో ఈ నెల రోజులు గుడ్లు, ఉల్లిపాయ కొనలేదని.. ఆదివారం కొనుగోలు చేయడానికి వెళ్లగా ధరలు చూసి షాక్ తిన్నామని ఓ వినియోగదారుడు వాపోయాడు.