హైకోర్టుకు కూడా అర్థం కాని డాక్టర్ల చేతిరాత!

డాక్టర్ల చేతి రాత మెడికల్ షాపు వాళ్లకు తప్పితే.. ఎవరికీ ఓ పట్టాన అర్థం కాదు. డాక్టర్ల హ్యాండ్ రైటింగ్ విషయమై సోషల్ మీడియాలో జోకులు పేలుతూనే ఉంటాయి. రాత ఇబ్బందులను అధిగమించడానికి కొన్నిపెద్ద ఆసుపత్రులు ప్రిస్క్రిప్షన్‌గా కంప్యూటరైజ్డ్ ప్రతిని అందిస్తున్నాయి. వైద్యుల చేతిరాత కేవలం రోగులనే కాదు.. ఏకంగా హైకోర్టును కూడా ఇబ్బంది పెట్టింది. డాక్టర్ రాసిచ్చిన రిపోర్టును చదివి అర్థం చేసుకోవడానికి అలహాబాద్ హైకోర్టు జడ్జి, లాయర్లు ఇబ్బంది పడ్డారు. దీంతో మెడికో లీగల్ కేసుల్లో ఛార్జిషీట్‌తోపాటు కంప్యూటరైజ్డ్ కాపీని లేదంటే టైప్ చేసిన రిపోర్ట్‌ను కూడా అందజేయాలని హైకోర్టు ఆదేశించింది.

మెడికో లీగల్, పోస్ట్‌మార్టం, ఫోరెన్సిక్, యాక్సిండెంట్ల లాంటి కేసుల్లో డాక్టర్లు ఇచ్చే నివేదికలు కీలకం అవుతాయి. ఇలాంటి కేసుల పరిష్కారంలో డాక్టర్లు ఇచ్చే రిపోర్టులదే ముఖ్య పాత్రగా న్యాయస్థానాలు భావిస్తాయి. కానీ వారు ఏం రాశారో చదివి అర్థం చేసుకోవడం మాత్రం కష్టంగా మారింది. ఈ విషయమై పిటీషన్ వేయగా.. డాక్టర్ల చేతి రాతతో కూడిన రిపోర్టుతోపాటు టైప్ చేసిన లేదా కంప్యూటరైజ్డ్ ప్రతిని కూడా ఛార్జీషిట్‌తో అందజేయాలని జస్టిస్ అజయ్ లాంబా, జస్టిస్ అజయ్ కుమార్ సింగ్‌లతో కూడిన లక్నో బెంచ్ ప్రభుత్వాన్ని ఆదేశించింది. నిర్ణీత గడువులోగా ఇందుకు అవసరమైన వసతులను ఆసుపత్రుల్లో కల్పించాలని ప్రభుత్వానికి సూచించింది.