యూపీ, పంజాబ్ ఎన్నికలపై లగడపాటి సర్వే

ఉమ్మడి ఆంధ్రప్రదేశ్ సమయంలో, ఆ తరువాత రాష్ట్ర విభజన అనంతరం వచ్చిన అసెంబ్లీ, పార్లమెంటు ఎన్నికల్లో ఏ పార్టీకి ఎన్ని సీట్లు వస్తాని మాజీ ఎంపీ లగడపాటి రాజగోపాల్ సొంత టీం ‘ఫ్లాష్ టీం’తో సర్వే చేయించేవారు. ఎవరు ఎన్ని సర్వేలు చేయించినా..లగడపాటి చేయించిన సర్వేలే అసలు ఫలితాలకు చాలా దగ్గరగా ఉండేవి.

ఇప్పుడు కూడా ఆయన ఉత్తర్ ప్రదేశ్, పంజాబ్ రాష్ట్రాల అసెంబ్లీలకు జరిగిన ఎన్నికల సరళిపై సర్వే చేయించారు.

ఉత్తర్ ప్రదేశ్ అసెంబ్లీ ఎన్నికల్లో బీజేపీ అతిపెద్ద పార్టీగా అవతరిస్తుందని చెప్పారు. 403 స్థానాలున్న అసెంబ్లీలో మేజిక్ ఫిగర్ 202కి బీజేపీ అటుఇటుగా సీట్లు సాధిస్తుందని చెప్పారు. ఎస్పీ-కాంగ్రెస్ లు కలిసినా...అఖిలేష్ కు కలిసి రాలేదని తేల్చేశారు.

కలంకిత నేతలకు టిక్కెట్లు ఇవ్వడం, కాంగ్రెస్ తో పొత్తు పెట్టుకోవడం, కుటుంబ కలహాలు ఎస్పీ ఓటమిగా ప్రధాన కారణాలని లగడపాటి చెప్పారు. 225 ఎస్పీ అభ్యర్థుల్లో 120 మంది అభ్యర్థుల ఓటమిపాలవుతారని పేర్కొన్నారు.

మోదీ చరిష్మా, రంజాన్ రోజున అఖిలేష్ ప్రభుత్వం నిరంతర విద్యుత్ సరఫరా చేసి..దీపావళినాడు కరెంటు కోతలు ఉంచారని మోదీ చేసిన ప్రసంగం ఓటర్లను ఆకట్టుకుందని లగడపాటి గుర్తు చేశారు. మెజార్టీ హిందూ ఓట్లను మోదీ బీజేపీకి మళ్లించలిగారని అన్నారు. బీజేపీ అధికారంలోకి వస్తే రైతుల రుణాలను మాఫీ చేస్తామని మోదీ ప్రకటించడం బాగా కలిసొచ్చిందని చెప్పారు.

ఇక 117 స్థానాలున్న పంజాబ్ అసెంబ్లీ ఈసారి కాంగ్రెస్ దేనని లగడపాటి సర్వే స్పష్టం చేసింది. 70 సీట్లు కాంగ్రెస్ ఖాతాలో పడితే..ఆప్ రెండో స్థానంలో నిలుస్తుందని...బీజేపీకి 4-5సీట్లకు పరిమితమవుందని సర్వే పేర్కొంది. మాజీ క్రికెటర్ సిద్ధూ కాంగ్రెస్ లో చేరడం ఆ పార్టీకి మరింత బలం చేకూరిందని లగడపాటి చెప్పారు.