రాష్ట్రపతి ఎన్నిక: 95 నామినేషన్లు తిరస్కరణ

రాష్ట్రపతి ఎన్నిక పోరు అధికార ఎన్డీయే అభ్యర్థి రామ్‌నాథ్ కోవింద్, ప్రతిపక్షాలు బలపరచిన మీరాకుమార్‌ల మధ్యే జరుగనుంది. రాష్ట్రపతి ఎన్నికలో పోటీ చేసేందుకు దాఖలైన 95 నామినేషన్లను ఎన్నికల సంఘం గురువారం తిరస్కరించింది.

నామినేషన్ దాఖలులో సరైన నిబంధనలు పాటించకపోవడంతో అవి తిరస్కరణకు గురయ్యాయి. రాష్ట్రపతి పదవికి పోటీ పడాలంటే ఎలక్టోరల్ కాలేజీలోని 50 మంది సభ్యులు ప్రతిపాదించడంతో పాటు మరో 50 మంది వారిని బలపర్చాలి. రామ్‌నాథ్ కోవింద్, మీరాకుమార్‌లు మాత్రమే ఈ నిబంధనలు పాటించారు. నిబంధనలు పాటించని 95 నామినేషన్లను ఈసీ తిరస్కరించింది. దీంతో ఇద్దరి మధ్యే పోటీ నెలకొంది.