బాల్కనీ నుంచి తోసేసి... కొడుకుని కాపాడాడు

రెండో అంతస్థులో ఉన్న బాల్కనీ నుంచి తన కొడుకుని నిర్దయగా తోసేశాడు ఓ తండ్రి. అతని నిర్ణయాన్ని అందరూ మెచ్చుకున్నారు. అదేంటీ కొడుకును తోసేస్తే పట్టుకుని చితక్కొట్టాలి కానీ... ఇలా మెచ్చుకుంటున్నారు? అలా కొడుకుని తోసేయక పోతే ఆ పిల్లాడు ఊపిరాడక మరణించే వాడు. చెన్నైలోని నాలుగంతస్థుల భవనం సెల్లార్లో భారీ అగ్ని ప్రమాదం జరిగిన సంగతి తెలిసిందే. ఆ ఘటనలో ఒకే కుటుంబానికి చెందిన నలుగురు మరణించగా, అయిదుగురు తీవ్రంగా గాయపడ్డారు. గ్రౌండ్ ఫోర్లో ఉన్న వారే మృత్యువాత పడ్డారు. ఇక రెండో, మూడో ఫ్లోర్లలో ఉన్న వారు తప్పించుకునే వీల్లేక చాలా సేపు విలవిల లాడిపోయారు.

రెండో అంతస్తులో జాన్ క్రిస్టోఫర్ కుటుంబం నివసిస్తోంది. పొగ ఇళ్లంతా కమ్ముకుని ప్రాణాలు తీసేందుకు ప్రయత్నిస్తుంటే... క్రిస్టోఫర్ తన పదేళ్ల కొడుకుని కాపాడుకునేందుకు ప్రయత్నించాడు. కింద ఉన్న వారిని దుప్పటి పరిచి పట్టుకోమని చెప్పి... బాల్కనీ నుంచి కొడుకుని కిందకి తోసేశాడు. ఆ బాలుడు కాళ్లకి తీవ్ర గాయాలు అయ్యాయి. కానీ ప్రాణానికి ఎలాంటి ప్రమాదం లేదని చెప్పారు వైద్యులు. కాసేపటికి జాన్ క్రిస్టోఫర్ దంపతులను కూడా రెస్క్యూ టీమ్ కాపాడింది. జాన్ మాట్లాడుతూ ఆ సమయంలో కొడుకు ప్రాణాల్ని ఎలా కాపాడాలన్న ఆలోచన వచ్చిందన్నారు. అదృష్టవశాత్తూ కొడుకు తలకి ఎలాంటి దెబ్బ తాక లేదని తెలిపారు.