తమిళనాట మరో ట్విస్ట్: కమల్‌తో కేజ్రీవాల్ భేటీ

జయలలిత మృతి చెందిన నాటి నుంచి తమిళనాట రాజకీయాలు రోజురోజుకూ రసవత్తరంగా మారుతున్నాయి. మొన్నటివరకూ అధికారం కోసం పోట్లాడుకున్న ఓపీఎస్, ఈపీఎస్ వర్గాలు ఇటీవలే ఒక్కటవగా.. తాజాగా పళని-పన్నీర్‌ వర్గంతో దినకరన్‌ పోరు ప్రారంభించాడు. ఈ రాజకీయ సందిగ్ధాన్ని తమకు అనుకూలంగా మార్చుకోవాలని బీజేపీ, కాంగ్రెస్ లాంటి జాతీయ పార్టీలు ప్రయత్నిస్తుండగా.. రాజకీయ అరంగేట్రానికి ఇదే సరైన సమయమని తమిళ సూపర్‌స్టార్లు కూడా భావిస్తున్నారు.

కబాలి రజనీకాంత్.. తన అభిమానులతో వరస భేటీలు పెడుతూ ఆసక్తిరేపినా చివరికి రాజకీయ ప్రవేశం గురించి ఎటూ తేల్చలేదు. కానీ, కథానాయకుడు కమల్ హాసన్ ఓ అడుగు ముందుకేసి త్వరలోనే రాజకీయాల్లో చేరతానని ప్రకటించారు. తాజాగా తమిళ రాజకీయాల్లో మరో ట్విస్ట్‌ చోటు చేసుకుంది. ఢిల్లీ సీఎం, ఆమ్‌ ఆద్మీ కన్వీనర్‌ అరవింద్‌ కేజ్రీవాల్‌ గురువారం (సెప్టెంబర్ 21) కమల్‌హాసన్‌తో భేటీ అయ్యారు. ఆయన స్వయంగా చెన్నైలోని కమల్‌ నివాసానికి వెళ్లి దాదాపు గంటపాటు చర్చలు జరపడంతో సర్వత్రా ఆసక్తి నెలకొంది.

కేజ్రీవాల్‌తో భేటీ అనంతరం కమల్‌ మీడియాతో మాట్లాడుతూ.. ‘గతంలో మా కుటుంబం నుంచి కొందరు రాజకీయాల్లో క్రియాశీలక పాత్ర పోషించారు. నేను మాత్రమే వాటికి దూరంగా ఉంటూ వచ్చాను. కానీ, ఇప్పుడు నేను రాజకీయాల్లోకి రావాల్సిన అవసరం ఉంది. అందుకోసం ఎంతో నేర్చుకోవాల్సి ఉంది. నా రాజకీయ జీవితం ప్రారంభించే ముందు కేజ్రీవాల్‌ నుంచి సలహాలు తీసుకున్నా. మా ఇద్దరి ఆలోచనలు, లక్ష్యాలు ఒకటే. ఆయనతో కలిసి అవినీతిపై పోరాడటానికి సిద్ధంగా ఉన్నా’ అని అన్నారు.

కేజ్రీవాల్‌ మాట్లాడుతూ.. ‘కమల్‌ ఎంతో మంచి వ్యక్తి.. ఆయన తప్పకుండా రాజకీయాల్లో రావాలి’ అన్నారు. ఇక ముందు కూడా తాము కలుస్తూనే ఉంటామని ఆయన చెప్పారు. 2015లోనూ కమల్‌.. కేజ్రీవాల్‌ను కలిశారు. అయితే అది ఓ సినిమా షూటింగ్‌ అనుమతి కోసమేనని అప్పుడు కమల్‌ చెప్పారు.

అంతకుముందు చెన్నై చేరుకున్న కేజ్రీవాల్‌ను.. కమల్‌హాసన్‌ కుమార్తె అక్షర స్వయంగా ఎయిర్‌పోర్టుకు వెళ్లి స్వాగతం పలికారు. అక్కడి నుంచి కేజ్రీవాల్‌ నేరుగా కమల్‌ నివాసానికి వెళ్లారు. దాదాపు గంటపాటు వివిధ విషయాలపై చర్చించిన అనంతరం ఇరువురూ కలిసి లంచ్ చేశారు.

ఇటీవలే కమల్‌.. రజనీతో కలిసి పనిచేయడానికి సిద్ధమేనని వ్యాఖ్యానించిన విషయం తెలిసిందే. అంతేకాకుండా ఆయన కేరళ సీఎం పినరయి విజయన్‌తోనూ ప్రత్యేకంగా భేటీ అయ్యారు. దీంతో కమల్‌ వామపక్ష పార్టీలతో చేతులు కలపనున్నారని వార్తలు వచ్చాయి. అయితే ఈ ఊహాగానాలకు చెక్‌ పెడుతూ.. తాను ఏ పార్టీలో కలవబోనని, సొంతంగా పార్టీ పెడతానని కమల్‌ ప్రకటించారు. చెప్పినట్టే సొంత పార్టీ పెడతారో.. లేదా దక్షిణాదిలో ఆప్ విస్తరణకు కేజ్రీవాల్‌కు చేయందిస్తారో.. వేచి చూడాల్సిందే.