సీరం ఇన్‌స్టిట్యూట్‌లో భారీ అగ్నిప్రమాదం

పుణేలోని దిగ్గజ ఫార్మా సంస్థ సీరం ఇన్‌స్టిట్యూట్ ఆఫ్ ఇండియాలో భారీ అగ్ని ప్రమాదం చోటు చేసుకుంది. సంస్థకు చెందిన నూతన ప్లాంట్‌లో‌ టెర్మినల్ 1లో నాలుగో, ఐదో అంతస్తు నుంచి పెద్ద ఎత్తున మంటలు ఎగసిపడుతున్నాయి. సమాచారం అందుకున్న అగ్నిమాపక సిబ్బంది రెస్క్యూ ఆపరేషన్ ప్రారంభించారు. 10 అగ్నిమాపక వాహనాలతో మంటలను అదుపు చేసేందుకు ప్రయత్నిస్తున్నారు. పుణేలోని మంజ్రీ ప్రాంతంలో ఈ కొత్త ప్లాంట్ ఉంది.

దేశంలో కరోనా వ్యాక్సిన్ల ఉత్పత్తిలో సీరమ్ ఇన్‌స్టిట్యూట్ ఆఫ్ ఇండియా కీలక పాత్ర పోషిస్తున్న సంగతి తెలిసిందే. ఆక్స్‌ఫర్డ్ - ఆస్ట్రాజెనెకా సంయుక్తంగా రూపొందించిన కొవిడ్ వ్యాక్సిన్‌ను భారత్‌లో ‘కొవిషీల్డ్’ పేరుతో ఈ సంస్థ ఉత్పత్తి చేస్తోంది. ఇక్కడ నుంచి దేశవ్యాప్తంగా టీకాలు పంపిణీ చేస్తున్నారు. విదేశాలకు కూడా వ్యాక్సిన్ ఎగుమతులు ప్రారంభమయ్యాయి.

ప్రమాదం చోటు చేసుకున్న భవనం నిర్మాణంలో ఉన్నట్లు న్యూస్ ఏజెన్సీ ఏఎన్‌ఐ ట్వీట్ చేసింది. కరోనా వ్యాక్సిన్లు, వ్యాక్సిన్ ప్లాంట్ సురక్షితంగా ఉన్నాయని వెల్లడించింది. ఘటనకు సంబంధించిన పూర్తి వివరాలు తెలియాల్సి ఉంది.


Also Read: కాకి మృతి.. ఎర్రకోట బంద్