నేను రైట్, లెఫ్ట్ కాదు 'సెంటర్': కమల్

వెండితెర నుంచి రాజకీయాల్లోకి వచ్చి సొంత పార్టీ పెట్టుకున్న కమల్ హాసన్ సెక్యులరిజానికి కట్టుబడి ఉంటానని హామీయిచ్చారు. తన పార్టీ పేరే ‘మక్కల్ నీధి మయ్యం’ అని అన్నారు. అంటే ప్రజా న్యాయ కేంద్రం (పీపుల్స్ జస్టిస్ సెంటర్) అని అన్నారు. జాతీయ జెండాలోని మూడు రంగుల్లో ఒక రంగు జెండా అంత విస్తరించాలని ఆశించడం సరికాదని అన్నారు. కాషాయరంగు త్యాగానికి చిహ్నమని గుర్తు చేశారు. మిగతా విశ్వాసాలను గౌరవించడంతో పాటు వారికి సముచిత స్థానం కల్పించాలన్నఉద్దేశ్యంతోనే జాతీయ జెండాను రూపొందించిన విషయాన్ని గుర్తుంచుకోవాలని సూచించారు.

ఇక ఆధ్యాత్మిక రాజకీయాలే తన అజెండా అని ప్రకటించి రాజకీయాల్లోకి వచ్చిన తన తోటి నటుడు రజనీకాంత్ అసలు రంగు కాషాయం అయితే అంతకు మించిన దురదృష్టం మరొకటి ఉండదని అన్నారు. రైట్ వింగ్‌ను విమర్శించినంత మాత్రాన తాను లెఫ్ట్ వింగ్ కాదని తేల్చిచెప్పారు. తనది 'సెంటర్‌వింగ్' అని స్పష్టం చేశారు. 'సెక్యూలర్' అన్న పదాన్ని రాజ్యాంగం నుంచి తొలగించేందుకు కొంత మంది చేస్తున్న ప్రయత్నాలను ఎదుర్కొంటానని అన్నారు.

ఇంత కాలం తమిళనాడులో చోటు దక్కకపోవడంతో ఇప్పుడు ద్రవిడ పార్టీలైన అన్నాడీఎంకే, డీఎంకే పార్టీల్లో ఒకదాన్ని తనవైపుకు తిప్పుకొని తమిళనాడులో బలపడాలని చూస్తున్న బీజేపీ ... అన్నాడీఎంకేను దువ్వడంలో సక్సెస్ అయిందని అన్నారు. బీజేపికి కొమ్ముకాస్తున్న అన్నాడీఎంకేని కూడా అంతే దూరంలో పెడతానని చెప్పారు.