కేరళ వరద బీభత్సం.. ఏడాది పాటు వేడుకలు రద్దు

భారీ వర్షాలు, వరదల బీభత్సంతో అతలాకుతలమైన కేరళ రాష్ట్రం పునర్నిర్మాణం కోసం కఠిన నిర్ణయాలు తీసుకుంటోంది. ఇందులో భాగంగా ఏడాది పాటు ప్రభుత్వ నిధులతో జరిపే అధికారిక వేడుకలన్నింటినీ రద్దు చేసింది. ఈ మేరకు అన్ని శాఖలకు ఆదేశాలు జారీ చేసింది. ఆ నిధులను ముఖ్యమంత్రి సహాయ నిధికి మళ్లించాలని పేర్కొంది. కేరళలో వందేళ్ల చరిత్రలోనే కురిసిన భారీ వర్షాల కారణంగా రాష్ట్రం తీవ్రంగా నష్టపోయిన సంగతి తెలిసిందే. దీంతో ప్రభుత్వ నిధులతో నిర్వహించే అధికారిక వేడుకలు, పలు కార్యక్రమాలను ఏడాది పాటు నిర్వహించకూడదని రాష్ట్ర ప్రభుత్వం నిర్ణచించింది.

ఏటా డిసెంబరులో అలప్పుళలో నిర్వహంచే స్కూల్‌ ఆర్ట్స్‌ ఫెస్టివల్‌ను కూడా రద్దు చేస్తున్నట్లు అధికారులు ప్రకటించారు. అంతర్జాతీయ ఫిలిం ఫెస్టివల్‌, యూనివర్సిటీ ఆర్ట్స్‌ ఫెస్ట్‌, స్టేట్ యూత్ ఫెస్టివల్, ఇతర యూత్‌ ఫెస్టివళ్లతో పాటు అన్ని అధికారిక వేడుకలు రద్దు చేస్తున్నట్లు తెలిపారు.

భారీ వరదల కారణంగా రాష్ట్రంలోని చాలా ప్రాంతాలు తీవ్రంగా దెబ్బతిన్నాయి. వర్షాలు తెరిపినిచ్చి వారం రోజులు గడుస్తున్నా.. ఇంకా చాలా ప్రాంతాలు జలదిగ్భందంలోనే ఉన్నాయి. మరోవైపు కలుషిత నీటి కారణంగా ర్యాట్ ఫీవర్ తదితర వ్యాధులు వేగంగా వ్యాప్తి చెందుతున్నాయి.

వరదల కారణంగా సుమారు 400 మంది ప్రాణాలు కోల్పోగా.. లక్షలాది మంది నిరాశ్రయులయ్యారు. కోట్ల రూపాయల విలువైన పంటలు, ఇళ్లు ధ్వంసమయ్యాయి. ఈ పరిస్థితి నుంచి కోలుకోవడానికి, కేరళ పునర్మిర్మాణానికి ఎన్నో ఏళ్ల సమయం పడుతుంది. పెద్ద మొత్తంలో డబ్బు అవసరమవుతుంది. కేరళ తక్షణ అవసరాలకే రూ. 30 వేల కోట్లకు పైగా ఖర్చవుతుందని అంచనా.

ఈ నేపథ్యంలో కేరళ కూడా పొదుపు చర్యలు ప్రారంభించింది. అధికారిక వేడుకల కోసం డబ్బును వృథా చేయకుండా వరద సహాయ నిధికి మళ్లించాలని నిర్ణయం తీసుకుంది. కేంద్రం కేరళకు రూ.600 కోట్ల తక్షణ సహాయం ప్రకటించింది. ముఖ్యమంత్రి సహాయ నిధికి రూ. 1000 కోట్లకు పైగా విరాళాలు వచ్చాయి.

Read this in Malayalam