భారత్ సత్తా చాటిన.. త్రివిధ దళాల విన్యాసాలు

భారత సైనిక సంపత్తిని శత్రు దేశాలకు చాటి చెప్పేందుకు త్రివిధ దళాలు భారీ విన్యాసాలను చేపట్టాయి. ఈ విన్యాసాల్లో.. నౌకదళానికి అణ్వాయుధ సామర్థ్యం ఉన్న సబ్‌మెరైన్, యుద్ధ విమాన వాహక నౌక ఐఎన్ఎస్ విక్రమాదిత్య పాల్గొన్నాయి. వీటితోపాటు వైమానిక దళానికి చెందిన ఎస్‌యూ-30, జాగ్వర్ ఫైటర్లు కూడా ఈ విన్యాసాల్లో సత్తా చాటాయి. ఎలాంటి పరిస్థితినైనా ఎదుర్కోవడానికి సంసిద్ధంగా ఉన్నామని చాటి చెప్పేందుకు నౌకాదళం, వైమానిక దళం, ఆర్మీ, కోస్ట్ గార్డులు సంయుక్తంగా నెల రోజులపాటు ఈ విన్యాసాలను చేపట్టాయి. థియేటర్ లెవల్ రెడీనెస్ అండ్ ఆపరేషన్ ఎక్సర్‌సైజ్ (ట్రోఫెక్స్)గా ఈ విన్యాసాలను వ్యవహరిస్తారు.


విశాలమైన అరేబియా సముద్ర తీరం, ఉత్తర మధ్య హిందు మహా సముద్రంలో ఈ విన్యాసాలను చేపట్టారు. శత్రువును తలెత్తే ముప్పును ఎదుర్కొనేందుకు, ఏ క్షణంలోనైనా త్రివిధ దళాలు అప్రమత్తంగా ఉన్నాయని చాటేందుకు వీటిని నిర్వహించారు. విపత్కర పరిస్థితుల్లో త్రివిధ దళాలు, కోస్ట్ గార్డ్ ఎంత సమర్థవంతంగా, సమన్వయంతో పనిచేస్తాయో తెలుసుకోవడానికి ఈ విన్యాసాలు ఉపయోగపడ్డాయని రక్షణ శాఖ వర్గాలు వెల్లడించాయి.

పశ్చిమ, తూర్పు నావల్ కమాండ్‌లకు చెందిన 45కిపైగా నౌకలు, అణ్వస్త్ర సామర్థ్యం ఉన్న చక్ర సహా ఐదు జలాంతర్గాములు, నౌకదళానికి చెందిన 50 ఎయిర్‌క్రాఫ్ట్‌లు, కోస్ట్ గార్డ్‌కు చెందిన 11 షిప్స్, ఆర్మీకి చెందిన ట్రూపులు, ఎయిర్‌ఫోర్స్‌కు చెందిన ఎయిర్‌క్రాఫ్ట్‌లు ఈ విన్యాసాల్లో పాల్గొన్నాయి. జనవరి 24 నుంచి ఫిబ్రవరి 23 వరకు వీటిని నిర్వహించారు.