Assam: కరోనా అనంతర సమస్యలతో మాజీ సీఎం తరుణ్ గొగొయ్ కన్నుమూత

అసోం మాజీ ముఖ్యమంత్రి తరుణ్‌ గొగొయ్‌ కన్నుమూశారు. కరోనా అనంతర అనారోగ్య సమస్యలో కొంతకాలంగా గౌహతి (Guwahati) హాస్పిటల్‌లో చికిత్స పొందుతున్న ఆయన ఆరోగ్యం సోమవారం (నవంబర్ 23) మరింత క్షీణించింది. పరిస్థితి విషమించడంతో సోమవారం సాయంత్రం ఆయన కన్నుమూశారని గౌహతి మెడికల్‌ కాలేజీ హాస్పిటల్ (జీఎంసీహెచ్‌) సూపరిండెంట్‌ అభిజిత్‌ శర్మ తెలిపారు. అసోం ఆరోగ్య శాఖ మంత్రి హిమంత బిశ్వశర్మ దీన్ని ధ్రువీకరించారు.

అసోం రాష్ట్రానికి సుదీర్ఘ కాలం ముఖ్యమంత్రిగా పనిచేసిన వ్యక్తిగా తరుణ్ గొగొయ్ చరిత్రలో నిలిచారు. కాంగ్రెస్ పార్టీ నేతగా దేశ రాజకీయాల్లోనూ కీలక పాత్ర పోషించారు. అసోంలో 2001 నుంచి 2016 వరకు కాంగ్రెస్‌ పార్టీని మూడు సార్లు అధికారంలోకి తీసుకురావడంతో గొగొయ్‌ పాత్ర అనితరసాధ్యమైంది. తన 50 ఏళ్ల రాజకీయ జీవితంలో 3 సార్లు ముఖ్యమంత్రిగా, ఆరుసార్లు ఎంపీగా సేవలు అందించారు.


తరుణ్‌ గొగొయ్‌ ఆగస్టు 25న కరోనా బారినపడ్డారు. రెండు నెలల పాటు చికిత్స అనంతరం కోలుకున్న గొగొయ్ అక్టోబరు 25న హాస్పిటల్ నుంచి డిశ్చార్జ్‌ అయ్యారు. అయితే.. ఆ సంతోషం ఎన్నో రోజులు లేదు. ఆయన మళ్లీ అనారోగ్యానికి గురికావడంతో నవంబరు 2న తిరిగి హాస్పిటల్‌లో చేర్పించారు.

కిడ్నీ, ఊపిరితిత్తులు తదితర అవయవాల్లో ఇన్‌ఫెక్షన్ సోకడంతో తరుణ్ గొగొయ్ ఆరోగ్యం క్షీణించింది. ఆయణ్ని వెంటిలేటర్‌పై ఉంచి చికిత్స అందించారు. ఆదివారం వైద్యులు ఆయనకు 6 గంటల పాటు డయాలసిస్‌ చేశారు. అయినప్పటికీ ఆయన ఆరోగ్య పరిస్థితిలో ఎలాంటి పురోగతి లేదని అసోం ఆరోగ్య మంత్రి హిమంత బిశ్వశర్మ తెలిపారు.

తరుణ్‌ గొగొయ్‌ మృతిపై ప్రధాని మోదీ దిగ్భ్రాంతి వ్యక్తం చేశారు. పలువురు ప్రముఖులు ఆయన కుటుంబసభ్యులకు సంతాపం తెలిపారు.


Also Read: ఆక్స్‌ఫర్డ్ వ్యాక్సిన్ అద్భుతంగా పనిచేస్తోంది..