శ్రీనగర్‌ ఎన్నికల్లో గెలిచిన మాజీ సీఎం!

జమ్ముకశ్మీర్‌లోని శ్రీనగర్‌ లోక్‌సభ నియోజకవర్గానికి జరిగిన రీ-పోలింగ్‌లో ఆ రాష్ట్ర మాజీ ముఖ్యమంత్రి ఫరూక్ అబ్దుల్లా విజయం సాధించారు. నేషనల్ కాన్ఫరెన్స్ పార్టీ అధినేత ఫరూక్ అబ్దుల్లా.. తన ప్రత్యర్థి, పీడీపీకి చెందిన నజీర్ అహ్మద్ ఖాన్‌పై 9 వేల ఓట్ల మెజార్టీతో విజయం సాధించారు. 2014 ఎన్నికల్లో ఫరూక్ ఇదే నియోజకవర్గం నుంచి పోటీ చేసి ఓడిపోయిన సంగతి తెలిసిందే. నాటి ఎన్నికల్లో గెలుపొందిన పీడీపీ అభ్యర్థి తారిఖ్ కర్రా తన పదవికి రాజీనామా చేసి, కాంగ్రెస్ పార్టీలో చేరడంతో ఈ స్థానానికి ఖాళీ ఏర్పడింది. తాజాగా నిర్వహించిన ఎన్నికల్లో ఈ స్థానానికి 9 మంది అభ్యర్థులు పోటీ పడ్డారు.

ఏప్రిల్‌ 9న నిర్వహించిన ఉప ఎన్నికల సందర్భంగా.. ఘర్షణ తలెత్తడంతో ఓటింగ్‌ శాతం తక్కువగా (7 శాతం) నమోదైన విషయం తెలిసిందే. ఈ ఘర్షణల్లో ఎనిమిది మంది మృతి చెందారు. దీంతో శ్రీనగర్‌లోని 38 కేంద్రాల్లో ఏప్రిల్ 13న రీపోలింగ్‌ నిర్వహించారు. ఘర్షణలు చెలరేగుతాయేమోనని ప్రజలు ఓటు వేయడానికి భయపడటంతో మరోసారి అతి తక్కువగా.. కేవలం 2 శాతమే పోలింగ్ నమోదైంది. ఇది ఇప్పటివరకూ దేశంలోనే అతి తక్కువ ఓటింగ్ శాతంగా ఉంది. ఇవాళ ఓట్ల లెక్కింపు చేపట్టి ఫలితాలు ప్రకటించారు.