డిప్యూటీ ఎన్ఎస్ఏగా ఖన్నా: ధోవల్ ఎఫెక్టేనా?

ఇటీవలే విజయ్ గోఖలేను విదేశాంగ కార్యదర్శిగా నియమించిన కేంద్రం మరో కీలక నిర్ణయం తీసుకుంది. రీసెర్చ్ అండ్ అనాలసిస్ వింగ్‌ (రా) మాజీ చీఫ్ రాజీందర్ ఖన్నాను మంగళవారం డిప్యూటీ నేషన్ సెక్యూరిటీ అడ్వైజర్‌గా నియమించింది. ప్రధాని మోదీ నేతృత్వంలోని కేబినెట్ నియామకాల కమిటీ ఈ మేరకు నిర్ణయం తీసుకుంది. 1978 రా కేడర్ అధికారి అయిన ఖన్నా.. 2014 డిసెంబర్ నుంచి రెండేళ్లపాటు రా చీఫ్‌గా బాధ్యతలు నిర్వర్తించారు.

ఆయన భద్రతామండలి సెక్రటేరియట్‌లో పొరుగు దేశాల అధ్యయనానికి సంబంధించి ఓఎస్‌డీగా విధులు నిర్వర్తిస్తున్నారు. పాకిస్థాన్ ఉగ్రవాదాన్ని భారత్‌పైకి ఉసిగొల్పడం పెచ్చుమీరుతున్న తరుణంలో ఖన్నా నియామకం ఆసక్తిని కలిగిస్తోంది. ఇస్లామిక్ టెర్రరిజం, పాకిస్థాన్ వ్యవహారాల్లో ఖన్నాకు పట్టు ఉండటమే దీనికి కారణం.

ప్రధాన మంత్రి నేతృత్వంలో జాతీయ భద్రతా మండలి పని చేస్తుంది. దేశ అంతర్గత, విదేశీ శక్తుల రూపంలో తలెత్తే భద్రత సమస్యలకు సంబంధించిన అంశాలను ఇది పర్యవేక్షిస్తుంది. ఇందులో జాతీయ భద్రతా సలహాదారు అజిత్ ధోవల్‌ది కీలకపాత్ర. ఎన్ఎస్ఏ, డిప్యూటీ ఎన్ఎస్ఏ ఇద్దరూ ఇంటెలిజెన్స్ బ్యాక్‌గ్రౌండ్ నుంచే రావడం ఇదే తొలిసారి కావడం గమనార్హం. ఇండియన్ పోలీస్ సర్వీస్‌కు చెందిన అజిత్ ధోవల్ దేశ అంతర్గత భద్రతను పర్యవేక్షించే ఇంటెలిజెన్స్ బ్యూరో చీఫ్‌గా పని చేసి 2005లో రిటైర్ అయ్యారు.

చైనా రాయబారిగా పని చేసిన విజయ్ గోఖలేను విదేశాంగ కార్యదర్శిగా, పాకిస్థాన్ వ్యవహారాలపై పట్టున్న ఖన్నాను డిప్యూటీ ఎన్ఎస్ఏగా నియమించారు. కీలక పదవుల్లో వీరి నియామకం వల్ల భవిష్యత్తులో ఈ రెండు దేశాలతో దౌత్యపరంగా మరింత వ్యూహాత్మకంగా వ్యవహరించే వీలుంటుంది. వీరిద్దరిపై ధోవల్‌కు పూర్తి నమ్మకం ఉండటం మరో సానుకూల అంశం.