Mumbai: పేకమేడలా కుప్పకూలిన 4 అంతస్థుల భవనం

ముంబైలో (Mumbai) ఘోర ప్రమాదం జరిగింది. బోరివలి వెస్ట్‌లో శుక్రవారం నాలుగు అంతస్థుల భవనం కుప్పకూలింది. సాయిబాబా నగర్‌లో గీతాంజలి అపార్ట్‌మెంట్ పేరుతో ఉన్న ఆ భవనం అందరూ చూస్తుండగా నిట్టనిలువుగా కూలిపోయింది. మధ్యాహ్నం 12.30 గంటల నుంచి ఒంటి గంట మధ్యలో ఈ ఘటన జరిగినట్టు తెలుస్తుంది. పెద్ద భవనం పేకమేడలా కూలింది. అక్కడున్న వారంతా దానిని చూసి భీతిల్లిపోయారు. ఒక్కసారిగా పరుగులు తీశారు. అయితే ఈ ప్రమాదంలో ఎవరికీ ఎలాంటి గాయాలైనట్టు రిపోర్ట్ లేదు.


దీనికి సంబంధించిన సమాచారం తెలిసిన వెంటనే ఎనిమిది ఫైర్ ఇంజన్లు, అగ్నిమాపక దళ సిబ్బంది సంఘటనా స్థలానికి చేరుకున్నారు. సహాయక చర్యలు చేపడుతున్నారు. అయితే ముంబై మున్సిపల్ కమిషన్ (Brihanmumbai Municipal Corporation) ఇప్పటికే శిథిలావస్థకు చేరుకున్న నిర్మాణం అని లేబుల్ చేశారు. దాంతో ఇప్పటికే భవనాన్ని ఖాళీ చేశారు. ప్రస్తుతం ఆ బిల్డింగ్ ఖాళీగానే ఉంది. అయితే శిథిలాల కింద ఎవరైనా చిక్కుకున్నారా..? లేదా అని నిర్ధారించడానికి అధికారులు ప్రయత్నిస్తున్నారు. కాగా ఈ నెల ప్రారంభంలో థానే నగరంలో ఇలాంటి ఘటన చోటుచేసుకుంది. దహిసర్ ప్రాంతంలోని ఐదు అంతస్తుల నివాస భవనంలో ఒక భాగం కూలింది. అయితే అప్పుడు కూడా ఎవరూ గాయపడలేదు. అదేవిధంగా జూన్ నెలలో బాంద్రా వెస్ట్‌లోని శాస్త్రి నగర్‌లో గ్రౌండ్ ప్లస్ రెండు అంతస్తుల పెంకుటిల్లు కూలిపోయింది. ఆ ప్రమాదంలో 40 ఏళ్ల వ్యక్తి మరణించాడు. 19 మంది గాయపడ్డారు.