కేరళ సర్కారీ స్కూళ్లలో ఉచిత వైఫై

కేరళ రాష్ట్రంలోని విద్యావ్యవస్థ డిజిటలైజేషన్ దిశగా శరవేగంగా ముందుకు సాగుతోంది. ఆ రాష్ట్రంలోని 10వేల వరకు ప్రభుత్వ పాఠశాలలు త్వరలో ఉచిత వైఫై సౌకర్యాన్ని పొందనున్నాయి. ప్రభుత్వ రంగ టెలికాం సంస్థ బిఎస్ఎన్ఎల్ సాయంతో కేరళ ప్రభుత్వపాఠశాలలను వైఫైతో అనుసంధానించనున్నట్లు ఆ రాష్ట్ర అధికారి ఒకరు తెలిపారు. కేరళ రాష్ట్ర ఆవిర్భావ దినోత్సవాన్ని నవంబర్ 1వ తేదన జరుపుకుంటారు. అదే రోజు నుండి ఈ ఉచిత వైఫై సౌకర్యాన్ని అందుబాటులోకి తేవాలని ప్రభుత్వం యోచిస్తోంది. ఇప్పటికే ఇందుకు సంబంధించిన పనులు శరవేగంగా పూర్తవుతున్నాయి. నవంబర్ 1వ తేదీ నుండి విద్యార్థులందరికి 2 ఎంబీపీఎస్ వేగంతో ఉచితంగా వైఫై లభిస్తుంది.

ఇదిలా ఉండగా, దశాబ్దకాలం క్రితమే ఆ రాష్ట్రంలో ప్రభుత్వ విద్యాలయాల విద్యార్థులకు ఇన్ఫర్మేషన్ టెక్నాలజీనీ పరిచయం చేసే కార్యక్రమం ప్రారంభమైంది. ఈ కార్యక్రమంలో భాగంగా ఐదు వేల పాఠశాలలకు బ్రాడ్ బ్యాండ్ ఇంటర్నెట్ సేవలను ప్రారంభించారు. అది విజయవంతం కూడా అయింది. దాని స్ఫూర్తితోనే ఇన్ఫర్మేషన్ అండ్ కమ్యూనికేషన్ టెక్నాలజీ (ఐసీటీ) విధానాన్ని రూపొందించారు. ఈ విధానంలో భాగంగా చిన్న తరగతుల నుండే విద్యార్థులకు సాంకేతిక పరిజ్ఞానాన్ని పరిచయం చేయడంతో పాటు, వారు పెద్ద తరగతులకు వచ్చేసరికి ఐటీలో వారికి మంచి పునాదులు ఏర్పడేలా చేయడమే దీని లక్ష్యం అని అదికారులు వెల్లడించారు.