మురికి వాడలో వికసించిన క్రీడా కుసుమం

తాగుడుకు బానిసైన తండ్రి ఏడేళ్ల కిందటే కుటుంబాన్ని వదిలేశాడు. కంటి ఆపరేషన్ వల్ల తల్లి చూపు దెబ్బతింది. దీంతో పెద్ద కుమార్తె పనిచేస్తేనే ఇల్లు గడిచేది. ఆ కుటుంబం ఉండేదేమో ఓ మురికివాడలో. ఇలాంటి పరిస్థితుల్లో పెరిగిన ఓ అమ్మాయి ఫుట్‌బాల్ ప్లేయర్‌గా రాణిస్తుందని మీరు ఊహించగలరా! కానీ చెన్నైలోని మురికివాడలో పెరిగిన ఓ బాలిక అంతర్జాతీయ స్థాయిలో ఫుట్‌బాల్ ఆడనుంది.
ఎగ్మోర్‌లోని వాల్ ట్యాక్స్ రోడ్డులో ఉండే మురికివాడల్లో 16 ఏళ్ల సంగీత కుటుంబం నివాసం ఉంటోంది. చిన్నప్పటి నుంచి ఫుట్‌బాల్ ఆడటాన్ని ఇష్టపడే ఆమె స్కూల్ నుంచి ఇంటికి రాగానే జెర్సీ, షూ ధరించి ప్రాక్టీస్ కోసం గ్రౌండ్‌కి పరిగెత్తేది. చిన్నతనంలో ఇరుగుపొరుగున ఉండే అబ్బాయిలతో ఆడటం ఆమెకు అలవాటే. అయితే ఆటలు అమ్మాయిలకు సరిపడవని చాలా మంది ఆమెకు చెప్పి చూశారు. ఆమె తల్లి కూడా భయపడింది. వీరి మాటలని లక్ష్యపెట్టని సంగీత ఓ ఎన్జీవో సహాయంతో తన ఆటకు మెరుగులు దిద్దుకుంది. అలాంటి సంగీతకు గ్లాస్గోలో జరిగే సాకర్‌ టోర్నీలో ఆడే అరుదైన అవకాశం లభించింది. ఏటా 64 దేశాలకు చెందిన నిరాశ్రయ కుటుంబాలకు చెందిన పిల్లలతో ఓ ఫుట్‌బాల్ టోర్నమెంట్ నిర్వహిస్తున్నారు. సంగీతతోపాటు మనదేశం నుంచి 20 మందికి ఈ అవకాశం లభించింది. 9వ తరగతిలోనే చదువు మానేసిన సంగీత మళ్లీ చదువు బాటపట్టి ప్రస్తుతం 12వ తరగతి చదువుతోంది.