పెళ్లి కోసం కుట్ర.. హోటల్‌కు తీసుకెళ్లి అత్యాచారం

తనతో కాస్త చనువుగా ఉన్న ఓ అమ్మాయిని ఎలాగైనా పెళ్లి చేసుకోవాలని భావించిన యువకుడు అందుకోసం భారీ కుట్ర చేశాడు. ఆమెకు మాయమాటలు చెప్పి హోటల్‌కు తీసుకెళ్లి అత్యాచారం చేశాడు. స్నేహితుల సాయంతో ఆ కిరాతక పర్వాన్ని వీడియో తీయించాడు. తనను పెళ్లి చేసుకోవాలని.. లేదంటే ఆ వీడియోను సోషల్ మీడియాలో పెడతానని బెదిరింపులకు గురి చేశాడు. ఉత్తరప్రదేశ్‌లోని ఘజియాబాద్‌లో ఈ దారుణం చోటు చేసుకుంది.

ఫిబ్రవరి 7న మెహతబ్ అనే యువకుడు.. డిగ్రీ చదువుతున్న ఓ యువతిని హోటల్‌కు పిలిపించాడు. అక్కడ ఆమెకు మత్తు పదార్థం కలిపిన కూల్‌డ్రింక్స్‌ ఇచ్చాడు. ఆమె స్పృహ కోల్పోగానే ఓ గదిలోకి తీసుకెళ్లి అత్యాచారం చేశాడు.

యువతిపై మెహతబ్‌ అఘాయిత్యానికి పాల్పడటమే కాకుండా.. ముందస్తు ప్రణాళిక ప్రకారం తన మిత్రుల సాయంతో ఆ కీచకపర్వాన్ని సెల్‌ఫోన్లో చిత్రీకరించాడు. అనంతరం ఆమెకు ఆ వీడియో చూపించి, తనను పెళ్లి చేసుకోవాలని, మతం మార్చుకోవాలని.. లేకపోతే ఆ వీడియోలను ఆన్‌లైన్‌లో పెడతానని బెదిరించాడు.

ఫిబ్రవరి 15న సదరు యువతిని మరోసారి బెదిరింపులకు గురి చేసిన మెహతబ్.. ఆమె ఫోన్‌ లాక్కొని వేగంగా కదులుతున్న ఆటోలో నుంచి ఆమెను కిందకు తోసేశాడు. దీంతో ఆమె పోలీసులకు ఫిర్యాదు చేసింది. కేసు నమోదు చేసుకున్న పోలీసులు నిందితుడు మెహతబ్‌ను ఆదివారం (ఫిబ్రవరి 18) అరెస్టు చేశారు. అతడికి సహకరించిన మరో ఇద్దరు వ్యక్తుల కోసం గాలిస్తున్నట్లు పోలీసులు తెలిపారు.