మరోసారి అమెరికాకు చికిత్స కోసం గోవా సీఎం!

కాలేయ సంబంధిత సమస్యతో బాధపడుతున్న గోవా ముఖ్యమంత్రి మనోహర్ పారికర్ మరోసారి వైద్య చికిత్స కోసం బుధవారం (ఆగస్టు 29) రాత్రి అమెరికా బయలుదేరి వెళ్లనున్నారు. 62ఏళ్ల పారికర్‌ ఈ ఏడాదిలోనే అమెరికాలో చికిత్స పొంది జూన్‌లో భారత్‌కు తిరిగి వచ్చారు. మరోసారి చెకప్‌ కోసం ఆగస్టులో అమెరికా వెళ్లారు. అక్కడి నుంచి తిరిగివచ్చిన ఆయన ఆగస్టు 22న ఇండైజేషన్ కారణంగా వాంతులు చేసుకోవడంతో ముంబై లీలావతి ఆసుపత్రిలో చేరారు. ప్రస్తుతం ఆయన అక్కడే చికిత్స పొందుతున్నారు.

పారికర్ ముంబై నుంచి గోవాకు తిరిగి రానున్నట్లు రెండ్రోజుల క్రితం గోవా సీఎం కార్యాలయం ప్రకటించింది. ఈ మేరకు చికిత్స అనంతరం పారికర్ బుధవారం తిరిగి గోవాకు వెళ్లాల్సి ఉంది. అయితే లీలావతి ఆసుపత్రి వైద్యులు మాత్రం మరోసారి అమెరికాలో చికిత్స తీసుకోవాలని పారికర్‌కు సూచించారు. పారికర్ తిరిగి మళ్లీ చెకప్ కోసం అమెరికా వెళ్తున్నట్లు గోవా ముఖ్యమంత్రి కార్యాలయం కూడా ధ్రువీకరించింది. పారికర్ యూఎస్ పర్యటన సమాచారాన్ని కేబినెట్ మంత్రులకు ముఖ్యమంత్రి కార్యాలయం వెల్లడించినట్లుగా గోవా మంత్రి రోహన్ కుంతే తెలిపారు. పారికర్‌ ముఖ్యమంత్రి బాధ్యతలను ఎవ్వరికీ అప్పగించలేదని తనవద్దే ఉంచుకున్నారని ఆయన అన్నారు.