గోరఖ్‌పూర్‌‌ ఆసుపత్రిలో మరోమారు మృత్యుఘోష

గోరఖ్‌పూర్‌‌లోని బాబా రాఘవ్‌ దాస్‌ ప్రభుత్వ మెడికల్‌ కాలేజీ ఆసుపత్రిలో మృత్యువు విలయతాండవం చేస్తోంది. ఆగస్టులో ఆక్సిజన్‌ సరఫరా నిలిచిపోయిన కారణంగా 63 మంది చిన్నారులు మరణించిన విషయం మరవకముందే మరోసారి ఆ తరహా ఉదంతం పునరావృమైంది. గత నాలుగు రోజులుగా ఆసుపత్రిలో 75 మంది చిన్నారులు మృతి చెందారు. చిన్నారుల వరస మరణాలతో ఉత్తరప్రదేశ్‌ అట్టుడుకిపోయిన విషయం తెలిసిందే. యూపీ సీఎం యోగి ఆదిత్యనాథ్ 5 సార్లు ఎంపీగా ప్రాతినిధ్యం వహించిన నియోజకవర్గంలో మృత్యు పరంపర కొనసాగుతుండటంతో విపక్షాలు ఆగ్రహం వ్యక్తం చేస్తున్నాయి.

‘యూపీ సీఎం సిగ్గుతో తల దించుకోవాల్సిన ఉదంతమిది. ఆయనకేమైనా మానవత్వ విలువలు ఉంటే వెంటనే రాజీనామా చేసి పదవి నుంచి తప్పుకోవాలి’ అని బీఎస్పీ నేతలు మండిపడుతున్నారు. బాబా రాఘవ్‌ దాస్‌ మెడికల్‌ కాలేజీ అనేది గోరఖ్‌పూర్‌లో అతిపెద్ద ప్రభుత్వ ఆసుపత్రి. గోరఖ్‌పూర్‌తో పాటు పరిసర జిల్లాలకు చెందిన పేదలంతా వైద్యం కోసం ఇక్కడికే వస్తుంటారు.