సంక్షేమ పథకాలకి ఆధార్ కార్డు తప్పనిసరికాదు

'ప్రభుత్వం అందించే సంక్షేమ పథకాలకి ఆధార్ కార్డుని తప్పనిసరి నిబంధన చేయరాదు' అని సుప్రీం కోర్టు స్పష్టంచేసినట్టుగా పీటీఐ పేర్కొంది. అయితే, అదే సమయంలో బ్యాంక్ ఎకౌంట్స్‌కి ఆధార్ కార్డు అవసరం అనేటటువంటి నిబంధనల విషయంలో ఎటువంటి మార్పు వుండబోదని సుప్రీం తేల్చిచెప్పింది. ఆధార్ ని సవాలు చేస్తూ దాఖలయ్యే విజ్ఞప్తులపై విచారణ జరిపేందుకు ప్రత్యేకంగా ఓ ధర్మాసనం ఏర్పాటు చేయాల్సిన అవసరం వుందన్న కోర్టు... ప్రస్తుతానికి అది సాధ్యపడదు అని అభిప్రాయపడింది.

ఈ నెల మొదట్లోనే ఆధార్ వివాదంపై వివరణ ఇచ్చిన కేంద్ర ప్రభుత్వం.. ఆధార్ నెంబర్ లేదనే కారణంతో సంక్షేమ పథకాలు అందించకుండా ఏ ఒక్క లబ్ధిదారులనీ అనర్హులుగా పక్కకు పెట్టడంలేదని తెలిపింది. ఒకవేళ ఎవరికైనా ఆధార్ లేనిపక్షంలో, వారికి ఆధార్ నెంబర్ కేటాయించేంతవరకు ఇతర ప్రత్యామ్నాయ మార్గాలని సూచిస్తున్నట్టు కేంద్రం తన వివరణలో పేర్కొంది. అంతేకాకుండా ప్రతీ ఒక్కరికీ ఆధార్ నెంబర్ కేటాయించేందుకు వీలుగా ఆధార్ జారీ కేంద్రాలని ఏర్పాటు చేయాలని కేంద్రం సంబంధిత శాఖలకి ఆదేశాలు జారీచేసింది.