ఒమిక్రాన్ వేరియంట్ లక్షణాలు ఇవే..!

దేశంలో ఒమిక్రాన్ వేరియంట్ కేసులు వేగంగా నమోదవుతున్నాయి. అయితే ఈ వేరియంట్‌కు సంబంధించి మొదటి నుంచి వైద్య నిపుణులు వ్యాప్తి వేగంగా ఉంటుందని, తీవ్రత తక్కువగా ఉంటుందని చెబుతున్నారు. అదే విధంగా గంటల వ్యవధిలోనే ఒమిక్రాన్ వేరియంట్ కేసులు ఎక్కువగా నమోదవుతున్నాయి. ఈ వేరియంట్‌ సోకితే లక్షణాలు స్వల్పంగానే ఉంటాయని కూడా వైద్య నిపుణులు తెలియజేశారు. అయితే ఈ లక్షణాలపై ఇప్పటి వరకూ ఎలాంటి అధికారిక ప్రకటన రాలేదు. ఇప్పుడు ఒమిక్రాన్ వేరియంట్‌ లక్షణాలకు సంబంధించి కేంద్రం కీలక ప్రకటన చేసింది. గొంతునొప్పి, అలసట, ఒళ్లు నొప్పులు, జ్వరం వంటివి ఓమిక్రాన్ వేరియంట్ సాధారణ లక్షణాలుగా కేంద్రం పేర్కొంది. ఈ వేరియంట్ బారిన పడకుండా ఉండడానికి వ్యాక్సిన్ వేయించుకోవాలని, భౌతిక దూరం పాటించాలని ప్రజలకు తెలియజేసింది. ముఖ్యంగా మాస్క్‌లు పెట్టుకోవాలని, చేతులు శుభ్రంగా కడుక్కోవాలని సూచించింది.

లక్షణాలు తీవ్రంగా లేకపోయినా ఎక్కువ కేసులు నమోదైతే సమస్యలు తలెత్తే అవకాశం ఉంటుంది. వేగంగా వ్యాప్తి చెందే ఈ వేరియంట్‌కు దూరంగా ఉండాలంటే కోవిడ్ ఆంక్షలను కచ్చితంగా పాటించాలి. అయితే ఒమిక్రాన్ వేరియంట్‌తో రాజస్థాన్‌లో ఓ మరణం కూడా నమోదైంది. కాగా 24 గంటల్లో 4,461 ఒమిక్రాన్ కేసులు రిజిస్టర్ అయ్యాయి. మహారాష్ట్రలో 1247 ఒమిక్రాన్ కేసులు నమోదయ్యాయి. రాజస్థాన్‌లో 645, ఢిల్లీలో 546 నమోదయ్యాయి. కర్ణాటకలో 479 ఒమిక్రాన్ బాధితుల్లో 26 మంది కోలుకోగా.. కేరళలో 350 కేసుల్లో 140 మంది డిశ్చార్జ్ అయ్యారు.