నోట్ల కష్టాలకి ఇకపై కొంత ఉపశమనం!

రూ.500, 1000 నోట్ల రద్దు కారణంగా తాము ఎంతో అసౌకర్యానికి గురవుతున్నామని, ఎక్కడికెళ్లినా నగదు మార్చుకోవడానికి వీలులేకపోగా కనీసం తమ ఎకౌంట్లలో వున్న నగదుని కూడా డ్రా చేసుకోవడానికి వీలులేకుండా పోయిందని గత ఐదారు రోజులుగా అసంతృప్తితో వున్న వారికి ఇది కాస్త ఉపశమనం ఇచ్చే వార్త. ఈ అసౌకర్యం కారణంగా దేశవ్యాప్తంగా నోట్ల రద్దుపై ఆందోళనలు పెల్లుబుకుతుండటంతో ఇప్పటివరకు వున్న పరిమితులపై కొంతలో కొంతమేరకు మార్పుచేర్పులు చేస్తూ బ్యాంకులకి ఆదేశాలు జారీచేసింది కేంద్రం. ఇకపై బ్యాంకులోని కౌంటర్ల వద్ద నోట్లు మార్చుకోవడానికి వచ్చే వారికి రూ.4500 వరకు మార్చుకునే వెసులుబాటు కల్పించడంతోపాటు ఏటీఎంలలో డబ్బులు డ్రా చేసుకునే వారికి రూ.2500 వరకు డ్రా చేసుకునే అవకాశం ఇవ్వాల్సిందిగా కేంద్రం బ్యాంకులకి సూచించింది. నోట్ల రద్దు అనంతరం చోటుచేసుకుంటున్న పరిణామాలపై సమీక్ష నిర్వహించిన అనంతరం కేంద్రం తాజాగా ఈ నిర్ణయం తీసుకుంది.

ఇప్పటివరకు నగదు మార్చుకునేవారికి రూ.4000, ఏటీఎంలలో డ్రా చేసుకునేవారికి రూ. 2000 మాత్రమే అవకాశం వుండేంది. కొత్తగా పెంచిన పరిమితి పెద్ద మార్పు ఏమీ కాకపోయినప్పటికీ... గత ఐదారు రోజులుగా వున్న పరిస్థితితో పోల్చుకుంటే ఎంతో కొంత నయం అనే అభిప్రాయం వ్యక్తమవుతోంది. ఈ విషయంలో ఆర్బీఐతో కలిసి ఎప్పటికప్పుడు పరిస్థితిని సమీక్షిస్తున్న ఆర్థిక మంత్రిత్వ శాఖ.. నగదు డిపాజిట్లు, నగదు మార్పిడికి కేంద్రాలుగా పనిచేస్తున్న బ్యాంకులు, పోస్ట్ ఆఫీసుల్లో అన్నిరకాల నోట్లు అందుబాటులో వుండే విధంగా చర్యలు తీసుకోవాల్సిందిగా సంబంధిత విభాగాలకి ఆదేశాలు జారీచేసింది. కస్టమర్ల సౌకర్యార్ధం అత్యవసర సేవల్లో అందుబాటులో వుండే విధంగా ఆస్పత్రుల వద్ద బ్యాంకులు తమ మొబైల్ ఏటీఎం సేవలని అందించాల్సిందిగానూ కేంద్రం బ్యాంకులకి సూచించింది. రానున్న కొద్ది రోజుల్లో ఇదే విధంగా పరిమితులని క్రమక్రమంగా ఎత్తివేయనున్నట్టు కేంద్రం ఓ ప్రకటనలో స్పష్టంచేసింది.