రూ.40 చోరీ చేశాడు.. ఏడేళ్ల జైలు శిక్ష తప్పదు!

నలభై రూపాయలు చోరీ చేసినందుకు ఓ వ్యక్తికి ఏడేళ్ల శిక్ష తప్పేట్లు లేదు. ఆయన చోరీ చేసింది 20 రూపాయల నాణేలు మరి. 20 రూపాయల నాణేలు ఎక్కడివి అంటారా.. మీ అనుమానం నిజమే. అవి ఇంకా చెలామణిలోకి రాలేదు. ముంబైలోని ప్రభుత్వ మింట్ కాంపౌండ్‌లో ప్రింట్ అవుతున్నాయి. మనోడు ఆ నాణేలను తస్కరించింది కూడా అక్కడ నుంచే మరి. మార్కెట్లోకి విడుదల కాకముందే నాణేలను దొంగిలిస్తే.. సర్కార్ రియాక్షన్ మామాలుగా ఉంటుందా? పోలీసు అధికారులు అతడిపై ఐపీసీ 381 సెక్షన్ కింద కేసు పెట్టారు. అతడి నేరం రుజువైతే.. ఈ సెక్షన్ కింద ఏడేళ్ల జైలు శిక్ష అనుభవించాల్సిందే.

ముంబైలోని ఎంఆర్‌ఏ మార్గ్‌‌లోని ప్రభుత్వ మింట్‌లో పనిచేస్తూ చబుక్షర్ అనే వ్యక్తి రూ.20 నాణేలను తస్కరించాడు. అనంతరం ఆ నాణేలను రోజువారీ తనిఖీలతో బయటకు తీసుకెళ్లకుండా అక్కడే తన లాకర్‌లో ఉంచాడు. అతడి లాకర్‌‌లో నాణేలు ఉన్నట్లు అక్కడే భద్రత పర్యవేక్షిస్తున్న సీఐఎస్‌ఎఫ్‌కు చెందిన ఓ అధికారి గుర్తించారు. ఇద్దరు అధికారుల సమక్షంలో అతడి లాకర్ తెరిపించడంతో నాణేలు బయటపడ్డాయి.

అంటే.. ఆ నాణేలకు రక్షణగా ఉండాల్సిన వ్యక్తే వాటిని తస్కరించాడన్నమాట. అందుకే అతడిపై ఐపీసీ సెక్షన్ 381 కింద కేసు నమోదు చేశారు. నిందితుడు చబుక్షర్‌ ప్రభుత్వ మింట్‌ నుంచి నాణేలు తీయడం తొలిసారేనా? గతంలోనూ ఇలాంటి చర్యలకు పాల్పడ్డాడా అనే కోణంలో పోలీసులు దర్యాప్తు చేస్తున్నారు. అయితే.. కరోనా వైరస్‌ వ్యాప్తి నేపథ్యంలో నిందితుడిని ఇంకా అదుపులోకి తీసుకోలేదని పోలీసులు తెలిపారు. దర్యాప్తుకు సహకరించాలని అతడికి నోటీసులు ఇచ్చినట్లు చెప్పారు.

2019 మార్చిలో ప్రధానమంత్రి నరేంద్ర మోదీ పలు కొత్త నాణేలను విడుదల చేశారు. వీటిలో 20 రూపాయల నాణెం కూడా ఉంది. వాస్తవానికి ఈ ఏడాది ఏప్రిల్‌లోనే ఈ నాణెం విడుదల కావాల్సి ఉంది. కరోనా వైరస్‌ వ్యాప్తి నేపథ్యంలో అది వాయిదా పడింది.

Also Read: తండ్రికి కరోనా.. ముఖం చాటేసిన కొడుకులు, మంచిర్యాలలో విషాదం

Must Read: ముస్లిమే.. కానీ, రాముడంటే ప్రాణం, మందిరం నిర్మాణానికి మట్టితో బయల్దేరాడు