రైతులకు గుడ్ న్యూస్.. ఏప్రిల్ నుంచి ఖాతాల్లో డబ్బులు జమ

ప్రధాన మంత్రి కిసాన్ సమ్మాన్ నిధి పథకం కింద రైతుల ఖాతాల్లో మరో విడత డబ్బులు జమ చేయడానికి కేంద్రం గ్రీన్ సిగ్నల్ ఇచ్చింది. ఈ నగదును ఏప్రిల్ 1 నుంచి జూలై 31 మధ్య దశల వారీగా రైతుల ఖాతాలో జమ చేయనున్నారు. ఈ పథకంలో ఇప్పటి వరకు చేరని వారు మార్చి 31లోగా తమ పేరును పీఎం కిసాన్ స్కీమ్ అర్హుల జాబితాలో నమోదు చేసుకోవాలని అధికారులు వెల్లడించారు.

రైతుల ఆర్థిక చేయూత అందించడానికి మోదీ సర్కార్ 2019లో పీఎం కిసాన్ సమ్మాన్ నిధి పథకం ప్రవేశ పెట్టిన సంగతి తెలిసిందే. ఈ పథకంలో భాగంగా ఏటా రైతుల ఖాతాలో 6 వేల రూపాయలను కేంద్రం జమ చేస్తోంది. ఈ మొత్తాన్ని మూడు విడతలుగా అందజేస్తున్నారు. ఒక్కో విడతలో రూ.2000 రైతుల అకౌంట్లలో జమ చేస్తున్నారు.

ఈ పథకంలో భాగంగా మొదటి విడత డబ్బులను ఏప్రిల్ 1 నుంచి జులై 31 వరకు, రెండో విడత ఆగస్టు 1 నుంచి నవంబర్ 30 వరకు, మూడో విడత డిసెంబర్ 1 నుంచి మార్చి 31 వరకు రైతుల ఖాతాల్లో జమ చేస్తున్నారు. ఇప్పటి వరకు కేంద్రం రైతుల ఖాతాల్లో ఏడు విడతల నగదును జమ చేసింది. తాజాగా ఎనిమిదో విడత డబ్బులు జమ చేయనున్నారు..

ఈ పథకంలో చేరని వారు మార్చి 31లోగా నమోదు చేసుకుంటే ఎనిమిదో విడత నగదు వారి ఖాతాల్లో పడతాయి. పీఎం కిసాన్ వెబ్‌సైట్‌ (pmkisan.gov.in) లో అర్హుల జాబితాను చెక్ చేసుకోవచ్చు. బెనిఫీసియరీ లిస్టులో పేరు ఉందో, లేదో తెలుసుకోవడానికి ఇదే వెబ్‌సైట్‌ను సందర్శించాలి. ఆ లిస్టులో పేరున్నవారికి మాత్రమే ఈ పథకం కింద డబ్బులు వస్తాయి.

Also Read:

★ వామ్మో! వీళ్ల టాలెంట్ మైండ్ బ్లోయింగ్.. ఇది షోరూమ్‌ ట్రక్ కాదు!

★ ఏడాదిలోగా టోల్‌ప్లాజాలన్నీ క్లోజ్.. వాహనదారులకు గుడ్ న్యూస్