తప్పు ఎవరిదైనా వారిపై కఠిన చర్యలు తప్పవు: ఆదిత్యనాథ్

దేశవ్యాప్తంగా సంచలనం సృష్టించిన గోరఖ్‌పూర్ వరుస శిశు మరణాల ఘటనపై స్పందించిన ఉత్తర్ ప్రదేశ్ సీఎం యోగి ఆదిత్యానాథ్.. ఈ ఘటనలో ఆస్పత్రివర్గాల నిర్లక్ష్యం వుందని తేలితే సిబ్బందిపై కఠిన చర్యలు తప్పవు అని స్పష్టంచేశారు. గత వారం 68 మంది శిశువులు వరుసగా మృతి చెందిన గోరఖ్‌పూర్‌లోని బాబా రాఘవ్ దాస్ మెడికల్ కాలేజ్ హాస్పిటల్‌ని ఆదివారం తనిఖీ చేసిన అనంతరం సీఎం యోగి ఆదిత్యానాథ్ మీడియాతో మాట్లాడారు. తాను ముఖ్యమంత్రి అయ్యాకా ఈ ఆస్పత్రిని తనిఖీ చేయడం ఇది నాలుగోసారి అని చెప్పుకొచ్చిన మంత్రి, శిశువులు ఆక్సిజన్ అందక మృతి చెందారనే ఆరోపణల్లో నిజం లేదని అన్నారు. మెదడువాపు వ్యాధి వల్లే శిశువులు మరణించారని ఈ సందర్భంగా సీఎం మరోసారి స్పష్టంచేశారు.

"ఈ ఘటన వెనుకున్న నిజానిజాలని వెలికి తీసేందుకు ప్రభుత్వం ఓ ఉన్నత స్థాయి కమిటీని వేసింది. చిన్నారుల మృతికి ఆస్పత్రివర్గాల నిర్లక్ష్యమే కారణం అని కమిటీ దర్యాప్తులో తేలితే, అందుకు బాధ్యులైన వారిపై కఠిన చర్యలు తీసుకోకుండా విడిచిపెట్టం'' అని యోగి ఆదిత్యానాథ్ తేల్చిచెప్పారు. కమిటీ నివేదిక అందించే వరకు ప్రతీ ఒక్కరు ఓపిక పట్టాలని ఈ సందర్భంగా సీఎం విజ్ఞప్తి చేశారు.

ఆస్పత్రిలో ఆక్సీజన్ వాయువు నిల్వలు లేకపోవడమే గోరఖ్‌పూర్ ఘటనకి కారణం అని ఆరోపణలు వెల్లువెత్తుతున్న నేపథ్యంలో రాష్ట్రంలోని ఇతర మెడికల్ కాలేజీలు, ఆస్పత్రుల్లో ఆక్సీజన్ వాయువు, మెడిసిన్స్ నిల్వలు అవసరమైన మొత్తంలో అందుబాటులో వున్నాయో లేవా పరిశీలించుకోవాల్సిందిగా సంబంధిత వర్గాలకి ఆదేశాలు జారీ చేసినట్టు సీఎం తెలిపారు. ఉత్తర్ ప్రదేశ్ ప్రభుత్వానికి ప్రధాని నరేంద్ర మోదీ కేంద్రం తరపున అవసరమైన సహాయం చేస్తున్నారు అని అన్నారు యోగి ఆదిత్యానాథ్.