Marriage Conditions: అల్లుడికి మామ 3 వింత కండీషన్లు.. రిసెప్షన్ నుంచి వెళ్లిపోయిన వరుడు

Marriage Conditions: పెళ్లి అంటే ఎంతో సంతోషంగా జరుపుకునే వేడుక. అంగరంగ వైభవంగా వివాహ తంతు పూర్తయింది. రాత్రి బరాత్ కూడా ధూం ధాంగా నిర్వహించారు. అప్పగింతల కార్యక్రమం పూర్తయింది. వధూవరులు ఇద్దరూ వరుడి ఇంటికి వెళ్లారు. మరునాడు రిసెప్షన్ ఏర్పాటు చేశారు. అక్కడికి వచ్చిన వధువు తండ్రి.. వరుడికి 3 వింత షరతులు పెట్టాడు. దీంతో ఖంగుతిన్న పెళ్లి కొడుకు.. తనకు ఆ వివాహం వద్దని అక్కడి నుంచి వెళ్లిపోయాడు. దీనిపై పోలీస్ స్టేషన్‌కు వెళ్లి ఫిర్యాదు చేశాడు. ఈ ఘటన ఉత్తర్‌ప్రదేశ్‌లో జరిగింది. దీంతోపెళ్లయి 24 గంటలు కూడా కాకముందే.. అది అర్థాంతరంగా ఆగిపోయింది.

ఏం జరిగింది
ఉత్తర్ప్రదేశ్‌లోని ఝాన్సీ జిల్లా బారుసాగర్కు చెందిన మన్వీంద్ర అనే యువకుడికి.. దగ్గర్లో ఉన్న మరో గ్రామంలో ఉన్న జ్యోతి అనే యువతికి వివాహం నిశ్చయించారు. జూన్ 6 వ తేదీన మన్వీంద్ర, జ్యోతిల వివాహం అంగరంగ వైభవంగా నిర్వహించారు. వధూవరుల ఇద్దరు బంధువులు.. రాత్రి బరాత్‌లో పాల్గొని ఉత్సాహంగా గడిపారు. అనంతరం అప్పగింతల కార్యక్రమం పూర్తి చేసి వధువును వరుడి ఇంటికి సాగనంపారు. మరుసటి రోజు అయిన జూన్ 7 వ తేదీన రిసెప్షన్ ఏర్పాటు చేశారు. ఈ రిసెప్షన్‌కు అన్ని ఏర్పాట్లు పూర్తి కాగా.. పెళ్లి కూతురు సవతి తండ్రి అందరికీ షాకిచ్చాడు. వరుడికి 3 విచిత్రమైన షరతులు విధించాడు.

ఏంటా షరతులు
కొత్త దంపతులు ఇద్దరూ సెక్స్ చేసుకోవద్దని ప్రధానంగా షరతు విధించాడు. దీంతోపాటు వధువుతోపాటే ఆమె చెల్లెలు కూడా వరుడి ఇంటికి వస్తుందని.. ఆమెతో పాటే ఉంటుందని చెప్పాడు. ఇక తాను ఏ సమయంలోనైనా కుమార్తె ఇంటికి వస్తానని.. ఎందుకు వచ్చావని ఎవరూ అడగకూడదని షరతు విధించాడు. వధువు సవతి తండ్రి విధించిన 3 షరతులకు అటు వరుడితోపాటు రిసెప్షన్‌కు హాజరైన బంధువులు, అతిథులు.. నోరెళ్ల బెట్టారు.

వెళ్లిపోయిన వరుడు
వధువు సవతి తండ్రి పెట్టిన షరతులకు వరుడు షాక్‌కు గురయ్యాడు. ఆ షరతులు అంగీకరించక పోవడంతో రిసెప్షన్ మధ్యలోనే ఆగిపోయింది. దీంతో పెళ్లి కూతురు.. తన చెల్లి, తండ్రితో పాటు తన ఇంటికి వెళ్లిపోయింది. ఈ ఘటనపై కోపంతో పెళ్లి కొడుకు తరఫు కుటుంబసభ్యులు.. స్థానికంగా ఉన్న బారుసాగర్ పోలీస్ స్టేషన్లో ఫిర్యాదు చేశారు. పెళ్లికి దాదాపు రూ. 10 లక్షల వరకు ఖర్చు అయిందని.. పెళ్లి కూతురుకు రూ. 3 లక్షల విలువైన బంగారు, వెండి ఆభరణాలు పెట్టామని పేర్కొన్నారు. పెళ్లి కూతురును తీసుకెళ్లిన సవతి తండ్రి.. ఆమె ఒంటిపై ఉన్న బంగారం, వెండి కూడా తీసుకెళ్లడం గమనార్హం. దీనిపై కేసు నమోదు చేసినట్లు పోలీసులు తెలిపారు. త్వరలోనే విచారణ పూర్తిచేస్తామని చెప్పారు.