వీడియో: అమ్మాయితో పోకిరీల వెకిలి చేష్టలు

ఆడపిల్లలు ఆరుబయటకు వెళ్లాలంటే వణికిపోయే పరిస్థితులు వచ్చాయి. పోకిరీలను కట్టడి చేయడానికి ప్రభుత్వాలు ఎన్ని చర్యలు తీసుకున్నా సరైన ఫలితాలను ఇవ్వట్లేదు. మార్కెట్‌కు వెళ్లొస్తున్న అమ్మాయిని చుట్టుముట్టి నలుగురు పోకిరీలు వేధించారు. సైకిల్‌పై వస్తున్న ఆమెను అడ్డుకొని అసభ్యంగా ప్రవర్తించారు. ఆ అమ్మాయి ఎదురుతిరగడంతో అసభ్య పదజాలంతో దుర్భాషలాడారు. ఉత్తరప్రదేశ్‌లోని జాన్‌పూర్‌లో ఈ ఘటన చోటుచేసుకుంది.

ఆ అమ్మాయి పోకిరీలకు ఏమాత్రం లొంగకుండా ధైర్యంగా ఎదిరించింది. అమ్మాయిపై యువకులు వేధింపులకు పాల్పడుతుండగా అక్కడే ఉన్న ఓ వ్యక్తి తన సెల్ ఫోన్లో చిత్రీకరించారు. ఆ వీడియోను సోషల్ మీడియాలో పోస్టు చేయడంతో వైరల్ అయింది. విషయం కాస్త పోలీసుల వద్దకు చేరడంతో వారు రంగంలోకి దిగారు.
బాధితురాలి ఫిర్యాదు మేరకు దర్యాప్తు ప్రారంభించిన పోలీసులు.. వేధింపులకు పాల్పడ్డ యువకులను అదుపులోకి తీసుకొని విచారిస్తున్నారు. ఈవ్ టీజింగ్ నుంచి యువతులు, మహిళల రక్షణ కోసం ఉత్తరప్రదేశ్ ప్రభుత్వం యాంటీ రోమియో బృందాలను ప్రవేశపెట్టినా.. పోకిరీల వెకిలి చేష్టలు తగ్గుముఖం పట్టకపోవడం ఆందోళన కలిగిస్తోంది.