జీఎస్టీకి కొత్త అర్థం చెప్పిన మోదీ..

జీఎస్టీకి ప్రధాని మోదీ కొత్త అర్థాన్ని చెప్పారు. జీఎస్టీ అంటే ‘గ్రోయింగ్ స్ట్రాంగ‌ర్ టుగెద‌ర్’ అని మోదీ పేర్కొన్నారు. సోమవారం (జులై 17) పార్లమెంట్ వర్షాకాల సమావేశాల ప్రారంభానికి ముందు ఆయ‌న మీడియాతో మాట్లాడారు. అన్ని పార్టీలు క‌లిసి ప‌నిచేస్తే ఎలాంటి మంచి సాధ్య‌మ‌వుతుందో చెప్ప‌డానికి జీఎస్టీయే నిద‌ర్శ‌న‌మ‌ని ఆయన అన్నారు. ఇదే స్ఫూర్తితో అన్ని పార్టీలు క‌లిసి ఈ స‌మావేశాల‌ను కూడా విజ‌య‌వంతం చేస్తార‌ని ఆశిస్తున్న‌ట్లు ఆయ‌న పేర్కొన్నారు. వ‌ర్షాలు పుడమికి కొత్త పరిమళాన్ని తీసుకొచ్చినవిధంగా.. కొత్త ఆశలు, కలలతో విజయవంతంగా అమల్లోకి వచ్చిన జీఎస్టీ కూడా వ‌ర్షాకాల స‌మావేశాలకు అలాంటి అందాన్నే తీసుకొచ్చిందని ప్రధాని పేర్కొన్నారు. అంతకుముందు ఆయన రాష్ట్ర‌ప‌తి ఎన్నిక‌ల్లో ఓటు హక్కు వినియోగించుకున్నారు.

పార్ల‌మెంట్ వ‌ర్షాకాల స‌మావేశాలు ఆగ‌స్టు 11 వ‌ర‌కు జ‌ర‌గ‌నున్నాయి. క్విట్ ఇండియా ఉద్యమ ప్రారంభానికి 75 వసంతాలు పూర్తవుతున్న సందర్భాన్ని పురస్కరించుకొని ఆగస్టు 9న లోక్‌సభ, రాజ్య సభల్లో నిర్వహించే కార్యక్రమాల్లో సభ్యులందరూ ఏకాభిప్రాయంతో వ్యవహరించి విజయవంతం చేస్తారని ఆశిస్తున్నట్లు ప్రధాని పేర్కొన్నారు.