సచ్ఛీలత నిరూపించుకో.. భర్తకు పరీక్ష పెట్టిన భార్య

భార్యలకు భర్తలు పరీక్షల పెట్టే స్టోరీలు రీల్ లైఫ్‌తో పాటూ రియల్ లైఫ్‌లో చూసే ఉంటాం. అయితే రివర్స్‌లో భర్తకే భార్య పరీక్ష పెడితే ఎలా ఉంటుంది. వినడానికి కాస్త వెరైటీగా ఉంది కదూ.. సరిగ్గా ఇలాంటి ఘటనే గుజరాత్‌లో ఒకటి జరిగింది. భర్తను సచ్ఛీలత నిరూపించుకోమంటూ భార్య పరీక్ష పెట్టడం హాట్‌టాపిక్ అయ్యింది. రాజ్‌కోట్‌లోని భగవతిపురాలో రాహుల్ పర్మార్, సుమన్‌లు భార్యాభర్తలు నివాసం ఉంటున్నారు. వారి ఇంటి పక్కనే ఓ 17 ఏళ్ల అమ్మాయి కూడా ఉంది. అయితే ఆ బాలికతో తన భర్తకు సంబంధం ఉందని సుమన్ అనుమానించింది.

భర్తపై అనుమానంతో ఓ పరీక్ష పెట్టాలని నిర్ణయించింది. రాహుల్‌తో పాటూ ఆ అమ్మాయిని కూడా పిలించింది. ఇద్దర్ని కాగుతున్న నూనెలో చేతులు పెట్టి తమ సచ్ఛీలతను నిరూపించుకోవాలని ఒత్తిడి తేవడంతో.. చేసేదేమీ లేక వారు నూనెలో చేతులు పెట్టారు. దీంతో ఆమె చేతికి తీవ్ర గాయాలుకాగా.. రాహుల్ చిన్న గాయాలతో బయటపడ్డాడు. వెంటనే జరిగిన ఘటనను తెలుసుకున్న అమ్మాయి తల్లిదండ్రులు పోలీసులకు ఫిర్యాదు చేశారు. ఘటనపై కేసు నమోదు చేసి.. బాధితురాలిని ఆస్పత్రికి తరలించి భార్యాభర్తల్ని అరెస్ట్ చేశారు.
Read This Story In English