ఆ 4 రాష్ట్రాల్లోనూ మాదే విజయం: అమిత్ షా

కోట్లాది మంది కార్యకర్తలు రేయింబవళ్లు శ్రమించడం వల్లే ఘన విజయం దక్కిందని బీజేపీ అధ్యక్షుడు అమిత్ షా అన్నారు. ప్రజలు తమ పార్టీపై విశ్వాసం ఉంచారని ఆయన అన్నారు. గుజరాత్, హిమాచల్‌ ప్రదేశ్‌ ఎన్నికల ఫలితాల నేపథ్యంలో సోమవారం (డిసెంబర్ 18) ఆయన మీడియాతో మాట్లాడారు. తాజా విజయాన్ని కార్యకర్తల గెలుపుగా అభివర్ణించారు. తమ పార్టీని గెలిపించిన గుజరాత్, హిమాచల్‌ ప్రదేశ్‌ ప్రజలకు ధన్యవాదాలు చెప్పారు.

‘అభివృద్ధి, సంక్షేమం, సుపరిపాలనకే ప్రజలు పట్టం కట్టారు. కులం కార్డుతో గెలవాలనుకున్న కాంగ్రెస్‌ను గుజరాత్ ఓటర్లు తిరస్కరించారు. హిమాచల్‌ ప్రదేశ్‌లో అవినీతిని ప్రజలు తిప్పికొట్టారు. కుల, వారసత్వ రాజకీయాలు చేసే పార్టీలకు ఈ ఎన్నికలు గుణపాఠం’ అని అమిత్ షా అన్నారు. 2019 సాధారణ ఎన్నికల్లోనూ తామే విజయం సాధిస్తామని ఆయన పేర్కొన్నారు.

కాంగ్రెస్‌తో తమకు హోరాహోరీ పోరు జరగలేదని, తాము పూర్తి ఆధిక్యం సాధించామని అమిత్ షా అన్నారు. తమకు ఓట్ల శాతం కూడా పెరిగిందని వెల్లడించారు. ‘ఒక్కో రాష్ట్రాన్ని గెలుస్తూ వస్తున్నాం. నరేంద్ర మోదీ నాయకత్వంలో 19 రాష్ట్రాల్లో అధికారాన్ని దక్కించుకున్నాం. కర్ణాటకతో పాటు రాబోయే 4 రాష్ట్రాల ఎన్నికల్లోనూ విజయం సాధిస్తాం’ అని ఆయన దీమా వ్యక్తం చేశారు.