హై కోర్టుకు డేరా బాబా.. ఎత్తుగడలు అవే!

తను నిర్దోషిని అంటున్నాడు.. డేరా సచ్ఛా సౌధ బాబా గుర్మీత్ సింగ్ రామ్ రహీమ్. అత్యాచారం కేసుల్లో దోషిగా తేలి ఇరవై సంవత్సరాల శిక్షను ఎదుర్కొంటూ రోహ్‌తక్ జైల్లో ఉన్న గుర్మీత్ తరఫున ఆయన న్యాయవాదులు హర్యానా రాష్ట్ర హైకోర్టులో పిటిషన్ దాఖలు చేశారు. గుర్మీత్ ను సీబీఐ కోర్టు దోషిగా తేల్చింది. అయితే కోర్టు తీర్పే సరి కాదు అని, తను నిర్దోషిని అనేది గుర్మీత్ వాదన.

ఇంతకు ముందు సీబీఐ కోర్టులో వినిపించిన వాదనలనే హై కోర్టులో కూడా వినిపించనున్నారు గుర్మీత్ న్యాయవాదులు. అత్యాచారం చేయడానికి గుర్మీత్ కు తగిన ‘శారీరక సామర్థ్యం’ లేదు అనేది వీరి వాదన. ఈ విషయాన్ని పరిగణనలోకి తీసుకుని.. ఆయనను నిర్దోషిగా తేల్చాలని వీరు అంటున్నారు. అలాగే అత్యాచార కేసుల్లో బాధితురాళ్ల స్టేట్ మెంట్ ను సీబీఐ రేప్ జరిగిందంటున్న ఆరేళ్ల తర్వాత రికార్డు చేసిందని, ఇది చెల్లదని గుర్మీత్ న్యాయవాదులు అంటున్నారు.

ఇలాంటి లొసుగులను ఉపయోగించుకుని గుర్మీత్ బయటపడదామని చూస్తున్నట్టుగా ఉన్నాడు. మరి హై కోర్టులో గుర్మీత్ పై అత్యాచారాల కేసు ఇంకెన్నేళ్లు కొనసాగుతుంది? గుర్మీత్ కు పడిన శిక్ష తగ్గుతుందా? పెరుగుతుందా? హైకోర్టులో పిటిషన్ వేసి, విచారణ అంటూ..బెయిల్ తీసుకుని గుర్మీత్ మళ్లీ బయటకు వస్తాడా? అనేవి సందేహాలిప్పుడు.