270.. డేరా బాబా రేప్ రికార్డ్!

‘నేను 100 మర్డర్లు చేశా.. 200 రేప్‌లు చేశా.. పోలీసులు నన్నేంచేయలేకపోయారు, నువ్వేంచేస్తావ్’ చాలా పాత తెలుగు సినిమాల్లో కొంత మంది విలన్లు చెప్పే డైలాగు ఇది. ఇది సినిమాకే పరిమితం అనుకుంటే పప్పులో కాలేసినట్లే. ఈ విలన్లను మించిపోయాడు మన డేరా బాబా. ఆధ్యాత్మికత ముసుగులో ఆయన చేసిన అకృత్యాలు అన్నీఇన్నీ కాదు. దైవదూతగా భావించి ఆయన ఆశ్రమంలో చేరిన 300 మంది సాధ్వీలలో 90 శాతం మంది గుర్మీత్ కామదాహానికి బలైపోయారు. అంటే సుమారు 270 మందిని బాబా బలవంతంగా అనుభవించాడు. కానీ ఎవరూ ప్రతిఘటించలేరు.. విషయాన్ని బయటకు చెప్పలేరు. బాబా ఉండే ‘గుఫా’ ఆయన వ్యక్తిగత నివాసం కాదని, సాధ్వీలకు నరక కూపమని రేపిస్టు బాబా వద్ద ఒకప్పుడు బాడీగార్డుగా పనిచేసిన బియాంత్ సింగ్ చెప్పాడు. గుర్మీత్ చేసిన దారుణాల గురించి ‘టైమ్స్ నౌ’కు వివరించాడు.

బాబా గుర్మీత్ ఎంత నీచుడో తనకు తెలుసని, 1995లో మౌంట్ అబులో ఓ బాలికపై గుర్మీత్ అత్యాచారం చేయడం నేను కళ్లారా చూశానని చెప్పాడు. ‘1995లో గుర్మీత్ మౌంట్ అబులో సత్సంగ్ నిర్వహించాడు. అక్కడ ఆయనుండే గదికి నేను కాపలా కాస్తున్నాను. ఓ 16 ఏళ్ల బాలికను తన రూమ్‌కి పిలుపుంచుకున్నాడు. సుమారు నాలుగు గంటలపాటు ఆ బాలికను బలవంతంగా అనుభవించాడు. నాకు బాలిక అరుపులు వినిపిస్తున్నా కాపడలేని దుస్థితి. నేనే కాదు అక్కడున్నవారు ఎవరూ బాబాను ఆపే ధైర్యం చేయలేదు. ఆ బాలిక పెద్దదై ఇప్పుడు డేరాలోనే ఉంది’ అని వివరించాడు. డేరా చీఫ్‌కు రెండు రేప్ కేసుల్లోనే శిక్ష పడింది కానీ అతని అఘాయిత్యాలు అంతుకు మించి ఉన్నాయని చెప్పాడు. డేరా సచ్చా సౌధలో ఉన్న 300 మంది సాధ్వీలలో 270కి పైగా మందిని బాబా రోజుకొకరి చొప్పున అనుభవిస్తున్నాడని వెల్లడించాడు.

హత్యలు చేసి శవాలను డేరాలో పూడ్చుతారు..
రేపిస్టు బాబాకు హత్యలు కూడా సర్వసాధారణమని బియాంత్ సింగ్ చెప్పాడు. డేరాలో తొలిసారి ఫకిర్‌చంద్ అనే వ్యక్తిని హత్య చేశారని వెల్లడించారు. అతన్ని అతిదారుణంగా చంపేసి డేరా సమీపంలో పూడ్చేశారని వివరించారు. అప్పటి నుంచి చాలా హత్యలు చేశారని, శవాలను పాఖ్రా నదిలో పడేసేవారని చెప్పాడు. ఆ తరవాత డేరా ఆశ్రమంలోనే ఖననం చేసేవారని, కొందరిని పూడ్చేసేవారని వెల్లడించారు. అస్థికలను డేరాలో ఉన్న పండ్లతోటలోనే వేస్తారని, ఇప్పటికీ ఆశ్రమంలో వెతికితే అస్థికలు దొరుకుతాయని చెప్పాడు.

హనీప్రీత్‌తో సంబంధం వేరే..
‘బాబాకు దత్త పుత్రికగా చెప్పుకునే హనీప్రీత్.. ఆయనకు కూతురు కాదు. డేరా బాబాతో ఆమెకు శారీరక సంబంధం ఉంది. బాబాకు పరమ భక్తుడైన బిశ్వాస్ గుప్తా భార్య హనీప్రీత్’ అని బియాంత్ చెప్పాడు. వాస్తవానికి బిశ్వాస్ బాబాకు అత్యంత సన్నిహితుడుగా ఉండేవారు. తరచూ డేరాకు వస్తుండేవారు. ఒకరోజు బిశ్వాస్ ఆశ్రమానికి వచ్చేసరికి బాబా తన బెడ్‌రూంలో హనీప్రీత్‌తో అసభ్యకర స్థితిలో ఉన్నారు. దీన్ని స్వయంగా చూసిన బిశ్వాస్.. ఆ తరవాత మీడియా ముందుకు వచ్చి బాబా రాసలీలలు బట్టబయలు చేశారు. అయితే ఆ తరవాత బిశ్వాస్ కుంటుంబాన్ని గుర్మీత్ చిత్ర హింసలకు గురి చేశారు.

డేరాలో చాలా మంది పురుషులను బాబా నపుంసకులిగా మార్చేశారని బియాంత్ సింగ్ చెప్పాడు. వారిలో సెక్యూరిటీ గార్డులు కూడా ఉన్నారని, వారు ఇంకా డేరాలోనే పనిచేస్తున్నారని వెల్లడించాడు. డేరాలో కోట్ల కొద్ది నల్లధనం కూడా ఉందని చెప్పాడు. అలాగే ఆర్డీఎక్స్, తుపాకులు వంటి మారణాయుధాలు కూడా ఉన్నాయని తెలిపాడు. డేరాలోని 40 శాతం మాత్రమే లైసెన్స్‌డ్ గన్స్ అని మిగిలిన 60 శాతం తుపాకులు అక్రమమైనవని చెప్పాడు.